भांगरभूंय | प्रतिनिधी
वर्सुकीं उत्पन्न मर्यादा केली 5 लाख, राज्य मंत्रीमंडळाचाे निर्णय
पणजी : सरकारी सेवेंत आसतना एखाद्या व्यक्तीक मरण आयले जाल्यार ताच्या घरच्या एका वांगड्याक नोकरी दिवपा खातीर आशिल्ली वर्सुकीं उत्पन्न मर्यादा तीन लाखां वयल्यान पांच लाख केल्या. राज्य मंत्रीमंडळान बुधवारा हाका मान्यताय दिल्या. एप्रील 2017 पसून अर्ज करूंक नाशिल्ले हे येवजणे खातीर अर्ज करपाक शकतात. सध्या अशा प्रकारच्या 370 जाणांची वळेरी सरकारा कडेन आसा, अशी म्हायती मुख्यमंत्री डॉ. प्रमोद सावंत हांणी दिली.
राज्य मंत्रीमंडळाच्या बुधवारा जाल्ले बसके उपरांत मुख्यमंत्री पत्रकारां कडेन उलयताले. ह्या वेळार तांचे वांगडा मंत्री मॉवीन गुदिन्हो हाजीर आशिल्ले. सरकारी नोकरेंत कार्यरत आसतना मरण आयिल्ल्यांच्या कुटुंबातल्या वांगड्याक सरकारी नोकरेंत आस्पावन घेवपा खातीर हाचे पयलीं वर्सुकीं तीन लाख उत्पन मर्यादा आशिल्ली. आतां ती वाडोवन पांच लाख रुपया केल्या. तशेंच फाटल्या पांच वर्सां पसून जांणी हे येवजणे खातीर अर्ज करूंक नात, तांकांय अर्ज करपाक मंत्रीमंडळान मान्यताय दिल्या, अशें मुख्यमंत्री डॉ. सावंत हांणी सांगलें.
मंत्रीमंडळाच्या ह्या निर्णयाक लागून पांच वर्सां पयलीं उत्पन्न मर्यादेक लागून संद मेळूंक नाशिल्ल्या जायत्या जाणांक आतां सरकारी नोकरेची संद मेळटली.
मंत्रीमंडळाचे म्हत्वाचें निर्णय
– 25 हजार चौखण मिटर सरकारी जमीन राष्ट्रीय आपत्ती निवारण दळाक दिवपाक मान्यताय.
-दक्षीण गोंयांतल्या चार गांवांनी 4-जी मोबायल टॉवर्स उबारपाक 100 ते 200 चौखण मिटर जमीन दिवपाक मंजुरी.
-खाजगी – भौशीक भागिदारी तत्वाचेर राज्यांतल्या शाळांनी विद्या अर्थीक मजत येवजणेचे कार्यवाहीक मान्यताय.
– हालींच राज्यांत आयोजीत केल्ल्या जी-20 परिशदांच्या खर्चाक मान्यताय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
