भांगरभूंय | प्रतिनिधी
हेर राज्यां प्रमाणूच येतली पारदर्शकताय; अधिवेशनांतूय दिल्लें स्पश्टीकरण
पणजी: हेर राज्यां प्रमाण गोंयांतूय सरकारी नोकरेचीं पदां हाचे मुखार गोंय कर्मचारी भरती आयोगा वतिनूच भरतले अशें मुख्यमंत्री डॉ. प्रमोद सावंत हांणी काल (बिरेस्तारा) परतून एकदां स्पश्ट केलें.
देशांतल्या हेर राज्यांनी सरकारी नोकरेचीं पदां कर्मचारी भरती आयोगा वतिनूच भरतात. ताका लागून नोकरभरतेंत पारदर्शकताय येवपाक मजत जाता. ताका लागून गोंयांतूय अशेच तरेन नोकर भरती करपाचो निर्णय आपल्या सरकारान घेतला अशें तांणी सांगलें.
8 जानेवारी 2022 मेरेन ज्या पदांचीं जायरात जाल्ली ना, तशेंच उपरांत तयार जाल्ल्या सरकारी नोकऱ्यांचीं पदां गोंय कर्मचारी भरती आयोगा वतीन भरतले अशें मुख्यमंत्र्यानी विधानसभेच्या पावसाळी अधिवेशनांत लेखी प्रस्नाचे जापेंत म्हणिल्लें.
कर्मचारी भरती आयोगाच्या नेमांचो मसुदो तयार आसा. ताचो परतून अभ्यास करून नेम अधिुसुचीत करतले आनी ते प्रमाणूच हाचे मुखार सरकारी खात्यांतल्या नोकरेचीं पदां भरतले अशेंय तांणी सांगिल्लें. ते प्रमाण, सरकारा कडल्यान आयोगाच्या नेम मसुद्याचो अभ्यास सुरू आसा आनी फुडल्या कांय दिसांनी नेम अधिसुचीत करतले आनी ते प्रमाण विवीध सरकारी खात्यांतलीं नोकरेचीं पदां भरतले अशें सरकारी गोपांनी सांगलें.
मजगतीं, विधानसभा वेंचणुके आदीं सरकारी नोकरेचीं धा हजार पदां भरपाची घोशणा मुख्यमंत्री डॉ. प्रमोद सावंत हांणी केल्ली आनी वेंचणूक तोंडार येतकूच विवीध खात्यांनी भरतीय सुरू केल्ली. पूण भौशीक बांदकाम खात्या सयत (पीडब्ल्यूडी) हेर कांय खात्यांतले नोकरभरतेंत भ्रश्टाचार जाल्ल्याचो आरोप केल्ल्यान कांय खात्यांतलीं नोकरभरती सरकारान आडावन दवरिल्ली.
पीडब्ल्यूडी तले नोकर भरते विशीं चवकशी समितीय स्थापन केल्ली. हे समितीन दिल्ल्या अहवालांत नोकर भरतींत गैरकारभार जाल्ल्याचो ठपको दवरिल्लो. ताका लागून ही भरतीच रद्द केल्ली. त्या वेळारूच मुख्यमंत्री डॉ. प्रमोद सावंत हांणी हाचे मुखार सरकारी पदांची नोकर भरती कर्मचारी भरती आयोगा वतीन करपाचो निर्णय घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
