भांगरभूंय | प्रतिनिधी
कोंकणी लेखक संघाचो वर्धापन दीस मनयलो उमेदीन
पणजी: हें कोंकणीचें कार्य पळोवन खूब खोस भोगता. आपल्याकूय बरयन दिसता. पूण वेळ मेळनाशिल्ल्या हें शक्य जायना, अशें समाजसेवक आनी उद्देजक अवधूत तिंबलो हांणी सांगून, सरकारी नोकरे फाटल्यान लागनासतना स्वता वेवसाय सुरू करचो आनी आपल्या पांयांर उबें रावचें आवाहन केलें.
कोंकणी लेखक संघाचो वर्धापन दीस हालींच पणजेच्या सरस्वती मंदिराच्या फॉमेंतो सभाघरांत जालो. ह्या वेळार अवधूत तिंबलो मुखेल सोयरे म्हणून उलयताले. सुवाळ्याची सुरवात मानेस्तां हस्तुकीं दिवली पेटोवन जाली.
ह्या वेळार माचयेर मुखेल सोयर्यां सयत विद्याप्रबोधिनी महाविद्यालयाचे प्राचार्य डॉ. भूषण भावे, मिलींद भरणे, सुफला गायतोंडे आनी अनघा कामत हाजीर आशिल्ले.
सुरवातेक रिया नास्नोडकार हांणी गणपती स्तवन सादर केलें. उपरांत भारती कुंकळ्येंकार आनी शैलेजा बाळे हांणी येवकार गीत सादर केलें.
सुफला गायतोंडे हांणी हाजीर आशिल्ल्या मानेस्तांक येवकार दिलो.
मुखेल सोयरे अवधूत तिंबलो आनी डॉ. भुषणभावे हांकां फुलांचो तुरो आनी भेटवस्त भेटोवन येवकार दिलो. शशिकांत पुनाजी हांणी मुखेल सोयर्यांची वळख करून दिली. ह्या वेळार संघाचे ज्येश्ठ वांगडी अशोक भोसलो आनी विजया शेल्डेंकार हांचो शाल, श्रीफळ आनी सरस्वतीची मुर्त भेटोवन भोवमान केलो.
अशोक भोसलो हांची वळख विवेक पिसुर्लेंकार हांणी करून दिली. जाल्यार विजया शेल्डेंकार हांची वळख सुशिला हळर्णकार हांणी केली. भोसलो हांणी भोवमान केल्ले खातीर संघाचे उपकार मानले. विजया शेल्डेंकार हांणी ह्या वेळार आपलें मनोगत उक्तायलें.
ह्या वेळार कोंकणी लेखक संघाचे आदले अध्यक्ष एन्. शिवदास हांणी आपले विचार मांडले.
ह्या सुवाळ्याचें सुत्रसंचालन निता कुर्टीकार आनी अनघा कामत हांणी उपकार मानले.
भोवमान कार्यावळी उपरांत संस्कृतीक कार्यावळ जाली. ह्या वेळार वेदांग प्रशांत भेंडे हांणी शेतकामतीचेर एकपात्री प्रयोग केलो. रामदास केळकार हांणी ‘करियर गायडन्स’ ह्या विशयाचेर भाशण केलें. पुष्पा नायक, महेश पारकार, भारती हेबळे, शैलजा बाळे, डॉ. उदय गांवकार, अॅना परेरा रॉड्रीगीस, वृषाली केळेकार, डॉ. नूतन देव, अविनाश कुंकळकार आनी सुनिल पालकार हांणी विनोदी आनी हेर तरेच्यो कविता वाचून आनी गावन सादर केल्यो. अकल्पिता रावत देसाय हांणीं आपले जिणेंतले विनोदी अणभव सांगले.
हे कार्यावळीचें सुत्रसंचालन अपर्णा गारुडी हांणी करून तांणीच सगळ्यांचे उपकार मानले.
ही कार्यावळ येसस्वी जावपा खातीर गौरीश वेर्णेकार हांणी सहकार्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
