भांगरभूंय | प्रतिनिधी
सुभाष फळदेसायः समन्वय घडोवन हाडपाचो करतले यत्न
भांगरभूंय। प्रतिनिधी
म्हापशें: सरकारी खात्यांनी आशिल्लो अंतर्गत समन्वयाचो उणाव होच सरकारा मुखा वयलो गंभीर विशय आसा. हाका लागून उदरगतीचीं कामां तशेंच सरकारी कामां आडखळून उरतात. प्रशासकी कामकाजांत सावळो गोंदळ उडटा. हाचे मुखार सरकारी खात्यांनी अंतर्गत समन्वय घडोवन हाडपाचो यत्न करतले अशी म्हायती समाज कल्याण मंत्री सुभाष फळदेसाय हांणी दिली.
बार्देस म्हालांतले भोंवडे वेळार काल (बुधवारा) सांजवेळा म्हापशेंच्या उपजिल्होधिकारी कचेरेंत विवीध सरकारी खात्यांच्या अधिकाऱ्यां बरोबर जोड बसका घेतले उपरांत मंत्री पत्रकारां कडेन उलयताले.
ह्या वेळार उपसभापती ज्योशुआ डिसोझा, मंत्री नीळकंठ हळर्णकार, आमदार मायकल लोबो, अॅड. कार्लुस फेरेरा, उपजिल्होधिकारी स्नेहा गित्ते हाजीर आशिल्ल्यो.
ह्या समन्वयाच्या उणावाक लागून भूंयगत वीज वाहिन्यो वा उदका वाहिन्याच्या कामा वेळार समस्या निर्माण जातात. रस्त्याच्या खणपाच्या कामा उपरांत ते रस्ते पयली भशेन जायनात. हो विशय खूबशे फावटी भौशीक बांदकाम खात्यांत आनी वीज खात्यांत दिसून येता अशें तांणी म्हणलें.
हे भोंवडे वेळार दिसून आयिल्ल्या समस्यांचो अहवाल मुख्यमंत्र्या कडेन मांडटले. मंत्रीमंडळांत ताचेर विचार विनिमय जाले उपरांत ताचेर उपाय काडटले अशें मंत्री फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
