सत्तरींत घसघशांचेर पर्यटकांची मस्ती

सत्तरी म्हालांतल्या घसघशाच्या वाठारांत जाल्ली कोयराची रास.

भांगरभूंय | प्रतिनिधी

सोऱ्यांचे बाटल्यांची रास; सैमीक विधी उक्ताडाचेरूच

भांगरभूंय । प्रतिनिधी

वाळपयः पावसाळ्यांत सत्तरी म्हालांतल्या खूबशा वाठारांनी कोसळपी घसघशे पळोवपाक आयतारा व्हड प्रमाणांत पर्यटक आयिल्ले. मात कांय पर्यटकांनी सोरो पियेवन हिसपा भायर मस्ती करून मेळत थंय सोऱ्याच्यो रित्यो बाटल्यो उडोवन गेले. हाका लागून थळाव्या लोकांनी खर तिडक उक्तायल्या. सरकारान अशा पर्यटकांचेर आळाबंद हाडचो, अशी नेटाची मागणी थळाव्या लोकांनी केल्या.

आयतारा सुयटेच्या दिसा घसघशे पळोवपाक आयिल्ल्या पर्यटकांनी हिसपा भायर मस्ती केली. तांणी घसघशांचेर प्लास्टीक बाटल्यांचो कोयर केलोच ते भायर कवचेच्यो बाटल्यो फोडून उडयल्यो. हाका लागून चडशा सगळ्याच घसघशां लागसारच्या लोकांनी हे गजालीक हरकत घेतली. सरकारी यंत्रणेन ह्या गजालींचेर नियंत्रण दवरचें, अशी तांणी मागणी केली.

मेळिल्ले म्हायती प्रमाण सत्तरी म्हालांत पावसाळ्यांत खूबशा वाठारांनी घसघशे कोसळटात. ते पळोवपा खातीर देशी- विदेशी पर्यटकूय येतात. चडशे गोंयकार शेनवारा- आयतारा व्हड प्रमाणांत ह्या घसघशांचेर पिकनिकेचें आयोजन करतात. आयतारा सत्तरी म्हालांतल्या पाली, हिवरे, चरावणे, कुमठोळ, नानेली, सालेली अश्या साबार घसघशांचेर व्हड प्रमाणांत पर्यटक आयिल्ले. दीसभर त्या घसघशांचेर गर्दी आशिल्ली. तातूंतल्या खूबशा पर्यटकांनी त्या वाठारांत कोयर करपाक सुरवात केली. थळाव्या लोकांनी तांकां कोयर करूं नाकात, बाटल्यो फोडूं नाकात अशी परतून परतून विनवणी केली, पूण ते तांकां बदले ना.

मजगतीं, हे संबंदांत मेळिल्ले म्हायती प्रमाण होंडा पंचायत वाठारांतल्या सालेली घसघशाचेर पर्यटकांनी चड मस्ती केली. कवचेच्यो बाटल्यो फोडल्यो, प्लास्टीक बाटल्यांचो कोयर केलोच ते भायर घसघसो पळोवपाक आयिल्ल्या एका कुटुंबांतल्या बायलांचींय कळ काडली. अशे तरेची मस्ती खऱ्यांनीच दुर्दैवी, अषें मत थळाव्यांनी उक्तायलां. अशे तरेचे मस्तेक लागून फुडारांत पर्यटक आनी थळाव्या लोकां मदीं तणावाची स्थिती निर्माण जावपाक शकता. ताका लागून संबंदीत खात्याचे यंत्रणेन ह्या प्रकारांचेर लक्ष दिवचें, अशी मागणी थळाव्या लोकांनी केल्या.

पुलिसांक फटोवन घसघशार पावता सोरो

सरकाराच्या अबकारी खात्याचे कर्मचारी खूबश वाठारांनी कडेन झडटी घेताले. मेळत तांचेर पुलीस खर कारवाय करताले. मात खूबश्या पर्यटकांनी पुलीस आनी अबकारी खात्याच्या कर्मचाऱ्यांचो दोळो चुकोवन सोऱ्याच्यो बाटल्यो घसघशा मेरेन व्हेल्यो. सोऱ्याचे घुंवळेंत केल्ली मस्ती जिवाचेर येवपाक शकता. आठ दिसां आदीं काजरेद्याट वाठारांत वास्कोचे दोन तरणाटे बुडिल्ले. ताका लागून सत्तरी म्हालांतल्या पावसाळी पर्यटनाक फटको बशिल्लो. आतां सत्तरी म्हालांतल्या खूबशा घसघशांचेर सोरो पियेवन मस्ती करपाचे प्रकार वाडल्यात. ते फुडारांत व्हड दुर्घटणेक निमंत्रण दिवपाक शकतात, अशी प्रतिक्रिया थळाव्या लोकांनी उक्तायली.

रान खातें शुल्क घेता, पूण सुविधा दिना

घसघशे पळोवपाक येवप्यां मदीं बायलांचोय आंकडो व्हड आसता. पूण तांकां कपडे बदलपाची तशेंच शौचालयाची वेवस्था थंय ना. रान खातें पर्यटकां कडल्यान शुल्क घेता, मात तांकां फावोशी सुविधा मात दिना. शौचालयाची सुविधा नाशिल्ल्यान चडशे पर्यटक उक्ताडाचेरूच सौमीक विधी करतात. हाका लागून घसघशांचेर घाणीचें साम्राज्य पाताळ्ळां, अश्यो थळाव्या लोकांनी कागाळी केल्यात.