भांगरभूंय | प्रतिनिधी
एक काळ असो आशिल्लो, जेन्ना ‘इंदिरा इज इंडिया’ हें उतर गाजतालें. आज मोदी म्हणल्यार भारत जाला. तशे आमी पयलीं सावन व्यक्त्ती पुजक. जो सत्तेर आसता ताचे पांय माथ्यार घेवप हेंच आमकां कळटा. राजेशाहींत जो राजा सत्तेर आसा ताकाच घेवन नाचपाची संवय आसली. हाकाच लागून जेन्ना मुगलांनी भारताचेर आक्रमण करून हांगा राज्य स्थपन केलें, तेन्ना हांगासरल्या राजांनी तांचे मांडलीक जावन रावपांत धन्यताय मानली. इतलेंच न्ही तर कांय जाण धर्मांतर करून मुसलमान जाले. कांय जाणांनी तर आपल्या घरच्यो बायलो लेगीत तांचे सुवादीन केल्यो. आनी जाणीं हें केलेंना तांकां सत्ता सोडची पडली. कांय जाण रानां- वनांनी रावन जाता तितले झगडले, पूण अपेशीच
थारले.
काल घडिल्लें तेंच आज घडटा. हाका आमीच कारण. जेन्ना इंदिरा गांधी सत्तेर आसली आनी परतून परतून वेंचून येताली तेन्ना शिक्को खंयूय मारात तो कांय वेळान ‘हातारुच’ उदेता म्हणपाचें आयकूंक येतालें. सरकारान शाईच अशी तयार केल्या ती खंयच्याय चिन्हार मारल्यार हातार उदेता अशें विरोधक सांगताले. उपरांत ईव्हीएम मशिना आयलीं. सद्याक भाजपा सरकार झुटयेर आसा आनी विरोधक म्हणटात खंयचोय बटण दामात, मत कमळाकूच वतलें. खरें फट उलोवपीच जाणात.
हाची याद जावपाचें कारण म्हणल्यार मडगांव म्युनिसिपालिटी. हालींच मडगांव म्युनिसिपालिटींत नगराध्यक्ष वेंचून काडपा खातीर वेंचणूक जाली. गुप्त मतदान जाल्ल्यान बॅलटाचो वापर जालो. सगळ्या दिगंबर समर्थकांनी आनी भाजप आमदारांनी दिगंबर समर्थक उमेदवाराक मत दिलें. अशें ते तरी नाल्लार हात दवरून सांगतात. हांगा ‘दिगंबर समर्थक’ म्हणपाचें कारण ही वेंचणूक जाल्या तेन्ना हे ‘दिगंबर समर्थक’ भाजपांत वचूंक नासले. ते काल- पयर भाजपांत गेल्यात. आतां ह्या समर्थकांनी नाल्लार हात दवरला तोय दामबाबाच्या देवळांत म्हणटकूच फट कशें समजुपाचें. पंदरा जाणांनी जाका मतां दिलीं ताका धाच मतां मेळ्ळीं. पांच मतां दुसर्याकूच पडलीं. हें कशें? बेठेंच दिसलें ती ‘इंदिरा इज इंडिया’ जमान्यांतली शाई बी चुकून म्युनिसिपालटींत पावली ना मूं? नासल्यार एकल्याचेर मारिल्लो शिक्को दुसर्याचेर कसो बसपाचो? कळप कठीण बाबा. ना म्हणल्यार विधानसभेंत सभापती वेंचणुके वेळार अशें एकदां घडिल्लें हाची याद दिगंबरूच करून दिता. तेन्ना काँग्रेसचे शाईन विरोधकांची साथ दिल्ली आसूंक जाय. नासल्यार गुप्त मतदान जावन पडटा तोच हात वयर काडल्यार जिखता हें कशें? हें गणीत आमकां कळपाचें न्ही.
तशें आमचें गणीत कच्चें म्हणपाचें मुख्यमंत्र्यान फाटीं जाहीर केलांच. पूण इतलें कच्चें कशें आसूं येत? तातूंत राजकारण्यांचें गणीत सहसा चुकना. गोंय विधानसभा वेंचणुके पयलीं आमचे तीस तरी सीट येतले म्हणपाचें भाजपाचे म्हणयारे सांगताले. मात्शें उसरां जायना तांचे गणीत सारकें आसलें म्हणपाचें ताणीं दाखोवन दिलां. लोकांनी मागीर दिवं कोणाकूय मतां. येवं खंयच्याय पक्षाचे उमेदवार वेंचून. ताणीं तिसांचो आंकडो गांठलोच पळे. मागीर तांचे गणीत कच्चें कशें म्हणपाचें?
सद्याक मात एक गजाल खरी मानचीच पडटली ती म्हणल्यार मत कोणाकूय दियात वेंचून येवपी कमळाचोच आसतलो. तशी शाई, बॅलोट पेपर वा ईव्हीएम ह्यो निर्जिव वस्तू. तांकां निश्टा कशी कळटली? निश्टा म्हणटा ती मनशाक कळपाची. काँग्रसच्या
मतांचेर वेंचून येवन भाजपांत उडकी मारप्याक निश्टेची याद
जायना. तशी भाजपांतल्यान काँग्रेसींत उडी मारतनाय ती जावंक नासली म्हणात. पूण, आपणाले समर्थक दुसर्यांक मत
दितात तेन्नाच निश्टा येवजता. जावं कशीय जायना निश्टा येवजप म्हत्वाचें.
आनी अशे वेळार प्रश्न पडटा गुप्त मतदान गरजेचें? ह्या वेंचणुकांनीच बदल घडोवन हाडल्यार कसो? फाल्यां जिल्हा परिशदेच्यो पोट वेंचणुको जावच्यो आसात. सुमार देड वर्सांन परतून म्युनिसिपालिटी आनी उपरांत लोकसभेच्यो वेंचणुको जावच्यो आसात. बॅलोट पेपर, शाई, बॅलोट बॉक्सां वा ईव्हीएम मशिनां ह्या सगळ्यांचेर कोट्यांनी रुपयांचो खर्च जाता. सद्याच्या काळांत तर मत हें सिक्रेट उरुंकू ना. कोणा कोणाचो समर्थक आनी कोण कोणाचो विरोधक हें जग जाहीर आसता. अशे वेळार ह्या सगळ्या खर्चाक कातर लावन हात वयर काडून मत दिलें जाल्यार सरकारी तिजोरे वयलो भार तरी उणो जातलो. सत्तेर येवप्यांक सरकारी तिजोरी भरूंक म्हारगाय वाडोवची पडची ना. नासल्यार दर दिसा पेत्रोल वाडलें, गॅस वाडलो हेंच आयकूंक येता आनी सामान्य मनशाक जगप कठीण जाता. तें तरी मात्शें उणें जातलें. गांवागांवांनी वचप, दर एका घरांतल्यांक हात वयर काडूंक लावप आनी ते मेजप. खंयच्या पक्षा वटेन कोणे हात वयर काडला तें बरोवन काडप. पारदर्शकताय मेळटली आनी खर्चूय वांचतलो. तशे म्हणून आज मेजोरेटी लोक दुडवांक मत दितात. जाचो विडो चड ताका मत. हात वयर काडिल्ल्यान विडो दितल्याक आपलो विडो घेवन मत दुसर्याक दिलें काय होय दुबाव उरचो ना.
मतदात्याची दुडवांवेली निश्टाय उमेदवाराक सारकी कळटली. आनी हाका लागून बाबडी शाई वा ईव्हीएम बदनाम जावंचें ना. ह्या कामाक इल्लें मनीसबळ लागतलें, पूण सामान सांबाळपाचें वजें आसचें ना. तकलेर कसलोच ताण आसचो ना. फकत हात पळयात आनी मतां मेजात. निकालूय झटपट मेळटलो. सगळीं ऑफिसां मतदाना निमतान दोनदोन दीस बंद दवरची गरज ना. सगळें कशें सुटसुटीत जातलें. निमाणें आमदारांक निश्टा महत्वाची दिसता न्ही? म्हणटकूच करचेंच हें. हांतल्यान मतदार कितलो लाचार, कितलो भिजूड आनी कितलो निश्ठावान हेंय कळून येतलें.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
