भांगरभूंय | प्रतिनिधी
दिवचल सम्राट क्लबाच्या अध्यक्षपदार निलेश टोपले
दिवचल: आमची म्हान आनी पुर्विल्ली संस्कृताय राखप काळाची गरज आसा. हें काम सम्राट क्लब दिवचलेन बरे तरेन सांबाळ्ळां, अशें आमदार डॉ. चंद्रकांत शेट्ये हांणी सांगलें.
दिवचल सम्राट क्लबाचे नवे अध्यक्ष निलेश टोपले आनी तांच्या संचालक मंडळाच्या अधिकार ग्रहण सुवाळ्यांत डॉ. चंद्रकांत शेट्ये मुखेल सोयरे म्हणून उलयताले. दिवचलच्या मोमेन्टस बॅन्केट सभाघरांत आयोजीत हे कार्यावळीक माचयेर शैलेश बोरकार, राजन राणे, शिवदास कंवठणकार, निलेश टोपले, सत्यवान नायक, शेखर नायक, डॉ. प्रवीण सावंत आनी हेर मानेस्त हजर आशिल्ले.
सुरवातेक सायली गर्दे हांणी गायिल्ल्या पसायदानान आनी दिवली पेटोवन कार्यावळ सुरू जाली. राजन राणे हांणी विश्वास गांवस, संतोष माशेलकार, नितीन नायक, सत्यवान हरमलकार, संदेश सरदेसाय, तुळशीदास मांद्रेंकार, शेखर साळगांवकार, राहुल कंवळेंकार, बाळकृष्ण वेर्णेंकार आनी हेरांनी सम्राट वांगडी पदाचो सोपूत दिलो. जाल्यार निलेश टोपले आनी तांच्या संचालक मंडळाक शैलेश बोरकार हांणी अधिकारपदाचीं सुत्रां दिलीं.
सगळ्यांच्या सहकार्यान दिवचल सम्राट क्लबचें काम नेटान फुडें व्हरतलों अशें निलेश टोपले हांणी सांगलें. शैलेश बोरकार, राजन राणे हांणीय ह्या वेळार आपले विचार मांडले.
आदले अध्यक्ष शिवदास कंवठणकार हांणी येवकार दिलो. राजन कडकडे हांणी सुत्रसंचालन केलें. सत्यवान नायक हांणी अहवाल सादर केलो. डॉ. प्रविण सावंत हांणी निमाणें उपकार मानले. राष्ट्रगीतान कार्यावळ सोंपली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
