भांगरभूंय | प्रतिनिधी
अधीर रंजन चौधरी हांच्या फुडारपणा खालचे संसदेचे इकरा वांगड्यांचे लोकलेखा समितीन लोकसभा सचिवालय आनी संरक्षण मंत्रालयाच्या अधिकाऱ्यां वांगडा हालींच गोंय नौदळ क्षेत्राक भेट दिली.
गोंयचे प्रभारी नौदळ अधिकारी कमोडोर आशिष गोयल हांणी ह्या प्रतिनिधींक येवकार दिलो. समितीन नौदळ हवाई स्टेशन आयएनएस हंसाक भेट दिली. थंय गोंय क्षेत्राचे फ्लॅग आॅफिसर कमांडिंग रिअर अॅडमिरल फिलिपोस जी प्यनुमूतिल हांणी येवकार दिलो. समिती मुखार भारतीय नौदळाच्या हवाई आॅपरेशन्साचें सादरीकरण केलें. जातूंत भारतीय नौदळान सुरू केल्ल्या आधुनिकीकरण प्रकल्पांची माहिती प्रतिनिधींक दिली.
उपरांत प्रतिनिधींनी फ्लाय-पास्ट सयत आॅपरेशन प्रात्यक्षिकां पळयलीं. मिग 29 के, डोनियर 228, कामोव 31 आनी एएलएच विमानां, बोईंग पी- 8 आय आनी आयएल 38 एसडी विमानांच्या थीर प्रदर्शनांत पीसी वांगड्यांक लाँग रेंज मेरीटायम रिओनेसान्स आॅपरेशन्सा विशीं लेगीत माहिती दिली. उपरांत तांकां नेव्हल एव्हिएशन म्युझियमांत व्हिंटेज विमानां, इंजिन आनी शस्त्रास्त्रांची मार्गदर्शनपर भोंवडी दिली जी भारतीय नौदळाच्या हवाई दळाचो समृद्ध इतिहास आनी दायज दाखयता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
