भांगरभूंय | प्रतिनिधी
संतूर वाद्याक संगीत विश्वांत प्रतिश्ठा मेळोवन दिवपी साधक
खबरां संस्था
नवी दिल्लीः जागतीक नामनेचे फामाद संतूरवादक पंडीत शिवकुमार शर्मा (84) संवसाराक अंतरले. मुंबयंत काळजाच्या आताकान तांकां मरण आयिल्ल्याची म्हायती मेळ्ळ्या. फाटल्या जायत्या दिसा पसून ते दुयेंत आशिल्ले. तांचेर हॉस्पिटलांत उपचार चलताले. संतूर वाद्याक संगीत विश्वांत वेगळी वळख निर्माण करून दिवपांत तांचें व्हड योगदान आशिल्लें.
1956 वर्सा तांणी व्ही. शांताराम हांच्या ‘झनक झनक पायल बाजे’ ह्या पदाक संगीत दिल्लें. 1967त तांणी नामनेचे बासुरीवादक हरिप्रसाद चौरासिया आनी ब्रिज भूषण काब्रा हांचे वांगडा ‘कॉल ऑफ द व्हॅली’ ही ध्वनिमुद्रिका प्रसिद्ध केल्ली. हरिप्रसाद चौरासिया हांचे मजतीन तांणी कांय चित्रपटांक संगीत दिलां. ताची सुरवात 1980 वर्सा ‘सिलसिला’ चित्रपटा पसून जाली. ह्या काळांत तांणी ‘शिव-हरी’ ह्या नांवान संगीत दिलें. तांणी फासले (1985), चांदनी (1989), लम्हे (1991), डर (1993) ह्याय चित्रपटांक संगीत दिलां.
सांस्कृतीक क्षेत्राचें व्हड लुकसाणः प्रधानमंत्री
पंडित शिवकुमार शर्मा हांच्या मरणान सांस्कृतीक क्षेत्राचें व्हड लुकसाण जालां. तांणी संतूर वाद्याक जगभरांत लोकप्रियता मेळोवन दिली. भारतीय शास्त्रीय संगिताच्या क्षेत्रांत पं. शिवकुमार शर्मा हांचें योगदान खूबच मोलाचें आसा. तांच्या मरणान संगीत मळार एक पोकळी निर्माण जाल्या. येवपी पिळग्यांचेर तांच्या संगिताची मोनेळ कायम उरतली, अशें ट्विट प्रधानमंत्री नरेंद्र मोदी हांणी केलां.
पं. शिवकुमार शर्मा हांकां मेळिल्ले पुरस्कार
पंडित शिवकुमार शर्मा हांकां जायते राष्ट्रीय तशेंच आंतरराष्ट्रीय सन्मान आनी पुरस्कार फावो जाल्यात. 1985त बाल्टीमोर, संयुक्त राज्याची मानद नागरिकता लेगीत मेळ्ळ्या. 1991त पद्मश्री, तशेंच 2001त पद्य विभूशण ह्या सन्मानान पंडितजी हांकां भोवमानीत केल्ले. पं. शिवकुमार शर्मा हांचो जल्म 13 जानेवारी 1938त जाला. ते मूळचे जम्मूचे रहिवासी. तांणी पिरायेच्या पांचव्या वर्सा पसून शास्त्रीय संगीत अानी तबल्याचे धडे घेवपाक सुरवात केल्ली. तशेंच 13व्या वर्सा पसून संतूर वादनाक सुरवात केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
