भांगरभूंय | प्रतिनिधी
भांगरभूंय प्रतिनिधी
मडगांव: कोंकणी भाशा मंडळ संचालीत रवीन्द्र केळेकार ज्ञानमंदिराची विद्यार्थिनी श्रेया परेश भट हिणें 98.5 टक्के गूण मेळयत गोंय शालांत मंडळान घेतिल्ले धावेचे परिक्षेंत गोंयांत दुसरें येवपाचो मान मेळयला.
तिका समाजशास्त्र आनी विज्ञान विशयांत (100), कोंकणी (99), इंग्लीश तशेंच गणित (98) जाल्यार हिंदी विशयांत (96) गूण फावो जाले. ह्या तिच्या येसा खातीर विद्यालयाचे वतीन ज्येश्ठ शिक्षणतज्ञ पांडुरंग नाडकर्णी हांचे हस्तुकीं भोवमान केलो.
ह्या वेळार ज्ञानमंदिराचे वेवस्थापन समितीचे अध्यक्ष प्रशांत नायक, वेवस्थापक अन्वेषा सिंगबाळ, वेवस्थापन समितीचे वांगडी चेतन आचार्य, मुख्याध्यापक अनंत अग्नी, पालक- शिक्षक संघाचे अध्यक्ष अनुप मडकयकार तशेंच शिक्षक, पालक, विद्यार्थी व्हडा संख्येन हाजीर आशिल्ले.
श्रेया परेश भट हिचें मुळावें शिक्षण विद्याभुवन कोंकणी शाळेंत जालां. अभ्यासा भायर विज्ञान प्रकल्प, सामान्य ज्ञान, कविता लेखन सर्तींत राज्य तशेंच राष्ट्रीय पांवड्यार श्रेयाक साबार इनामां फावो जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
