भांगरभूंय | प्रतिनिधी
चवथीच्या तोंडार कुंकळ्ळे एफडीएच्यो धाडी; सुमार 43 हजारांचो म्हाल नश्ट
भांगरभूंय । प्रतिनिधी
पणजीः कुंकळ्ळीच्या एका वेवसायिकान घरांतल्या शौचालयांत सांठोवन दवरिल्लो 210 किलो मावा आनी दुसऱ्या वेवसायिकान हळशीक सुवातेचेर तयार केल्लें 35 किलो फरसाण अन्न आनी वखदां प्रशासनान (एफडीए) जप्त करून नश्ट केलें. हेमराज सोलंकी आनी धनराम सोलंकी अशीं ह्या वेवसायिकांचीं नांवां आसात. बिरेस्तारा ही धाड घालून कारवाय केली.
चवथीच्या काळांत मिठायेक खूब मागणी आसता. ही संद घेवन कांय वेवसायीक खोऱ्यांनी पयसो ओडचे खातीर मनमानी करीत भेसळ आशिल्ले, निकृश्ट वा हळशीक सुवातेंत मिठाय तयार करतात. चवथ दोन दिसांचेर पाविल्ल्यान अशा गैरप्रकारांक ओतो आयला. ह्या वेवसायिकांचेर आळाबंद हाडचे खातीर एफडीएन मोहीम हातांत घेतल्या. हेच मोहिमे खाला बिरेस्तारा एफडीएच्या पंगडान कुंकळ्ळे धाड घालून दोन वेवसायिकांचेर कारवाय केली.
पयल्या वेवसायिकाच्या दुकानांत 6 हजार रुपयांचें 35 किलो फरसाण हळशीक सुवातेचेर तयार केल्ल्याचें स्पश्ट जालें. ताका लागून तें जप्त करून नश्ट केलें. दुसऱ्या दुकानांत 219 किलो गोड मावा घरांतल्या शौचालयांत सांठोवन दवरिल्ल्याचें स्पश्ट जालें. ह्या माव्याचें मोल 37 हजार 800 रुपया इतलें जाता. ताका लागून हो मावा कोयर प्रक्रिया प्रकल्पां व्हरून नश्ट केलो.
वयल्या दोनूय वेवसायिकां कडेन परवानो नाशिल्ल्यान एफडीएच्या कलम 31 खाला नोटीस जारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
