भांगरभूंय | प्रतिनिधी
काणकोणः काणकोण म्हालांतल्या शिक्षणीक संस्थांचे उदरगतीचे बाबतींत सामुहीक पद्दतीन एक सासणाचें धोरण करपाची गरज आसा, अशें सभापती रमेश तवडकार हांणी सांगलें. तशेंच शिक्षकांनी नवें तंत्रज्ञान आपणावचें, असो उलो मारलो.
माशें वाठारांतल्या श्री निराकार शिक्षण संस्था संचालीत रेखा रामदार फेणे विद्या मंदिराच्या नांव तकट्याचें अनावरण केले उपरांत सभापती तवडकार उलयताले. ह्या विद्यामंदिरा खातीर फेणे परिवारान अर्थीक आदार केला.
नांव तकट्याच्या अनावरण सुवाळ्याक फेणे हांची चली रंजना अशोक, निराकार शिक्षण संस्थेचे अध्यक्ष प्रशांत नायक, लोलयेंची सरपंच प्रतिजा बांदेकार, उपसरपंच चंद्रकांत सुदीर, निराकार विद्यालयाची मुख्याध्यापिका उर्वी फळदेसाय, रेखा रामदास फेणे, विद्यामंदिराचे मुख्याध्यापक दिनेश वेळीप, संस्थेचे सचीव नंदा सतरकार, पालक- शिक्षक संघाचे अध्यक्ष शैलेश पागी हाजीर आशिल्ले.
आमच्या पालकांनी फक्त पुस्तकी ज्ञानाकूच म्हत्व दिनासतना, आमचे विद्यार्थी कला, खेळ, नाच इतले पुरतेच मर्यादीत उरनासतना तांकां रांदपाक लेगीत येवपाक जाय, असो विचार केला, अशें विद्यालयाची आदली विद्यार्थिनी रंजना अशोक हांणी सांगलें आनी आदल्यो यादी ताज्यो केल्यो.
कार्यावळीक फेणे परिवारा वतीन हर्ष फेणे, मैत्रेय अशोक, आर. अशोक हाजीर आशिल्ले. रेखा रामदास फेणे विद्यामंदिराच्या भुरग्यांनी सादर केल्ल्या येवकार गिता उपरांत उर्वी फळदेसाय हांणी येवकार दिलो आनी प्रास्तावीक केलें. संस्थेचे सचीव नंदा सतरकार हांणी सोयऱ्यांची वळख करून दिली. सोहन पागी, विलंद महाले, सौम्या केसरकार, आराध्या सतरकार, आरवी गायक, प्रचिती नायक, रमेश सुदीर, वेलन डायस, रोनत मेहता हांणी सोयऱ्यांक फुलांतुरे भेटयले. सुनीर पैंगीणकार हांचो संस्थेचे अध्यक्ष प्रशांत नायक हांचे हस्तुकीं फुलांतुरो भेटोवन भोवमान केलो. कवींद्र फळदेसाय हांणी सुत्रसंचालन केलें, दिनेश वेळीप हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
