शिक्षणा वांगडा खेळूय म्हत्वाचो

भांगरभूंय | प्रतिनिधी

प्रवीण हिरे परब: विवेकानंद स्मृती संघ शिक्षण संस्थेचें स्नेहसंमेलन उमेदीन

केरी-सत्तरी: अभ्यासा वांगडा हेर उपक्रमांनीय वांटो घेवप गरजेचें. आतां अर्ती, परिक्षा म्हत्वाच्यो आशिल्ल्यान हातूंत विद्यार्थ्यांनी व्हडा प्रमांणांत वांटो घेवपाक जाय. शिक्षणा वांगडा खेळूय म्हत्वाचो. भरपूर वाचन करचेें. विद्यार्थ्यां मदीं निरीक्षणाची तांक आसूंक जाय, अशें उपजिल्होधिकारी प्रवीण हिरे परब हांणी सांगलें. 

केरी-सत्तरी हांगच्या विवेकानंद स्मृती संघ शिक्षण संस्था संचालीत विवेकानंद विद्यामंदीर मुळावें विद्यालय आनी विवेकानंद शिशू संस्कार केंद्र हांचें वर्सुकी स्नेहसंमेलन कार्यावळीच्या उक्तावण कार्यावळीक ते मुखेल सोयरे म्हणून उलयताले.

ह्या वेळार माचयेर मानाचे सोयरे म्हणून केरीची सरपंच दीक्षा चंद्रकांत गांवस, विवेकानंद शिक्षण संस्थेचे अध्यक्ष श्रीपाद गांवस, सचीव शिवाजी गाड, वेवस्थापक रामा बागी, विवेकानंद ज्ञान मंदीर हायस्कुलाचे प्रभारी मुख्याध्यापक गोपीनाथ गांवस, विवेकानंद ज्ञान मंदीर हायस्कुलच्या पालक शिक्षक संघाचे अध्यक्ष सोमा माजीक, विवेकानंद विद्यामंदिराच्या पालक शिक्षक संघाचे अध्यक्ष संतोष गांवस, विवेकानंद शिशू संस्कार केंद्राच्या पालक शिक्षक संघाचे अध्यक्ष संदीप गाड हाजीर आशिल्ले. दिवली पेटोवन कार्यावळ सुरू जाली. 

ह्या वेळार 2022-23 वर्साची अश्ठताशी विद्यार्थी म्हणून नर्सरींतल्या वंशिका संतोष गांवस, लक्षवीत कुष्ठा गांवस, बालवर्ग-1तलें स्वेजल सपनील शेटकार, पवन प्रेमानंद गांवस, बालवर्ग-2 तलें शैवी संदीप गाड, तनिश कृष्णा देसाय हांकां इनामां भेटयलीं. 

मुळाव्या विभागांत तोखणायेची विद्यार्थिनी म्हणून आर्वी अर्जून गांवस, तोखणायेची खेळां विद्यार्थिनी म्हणून निधी सत्यवान गांवस, अश्ठतासी विद्यार्थिनी श्राव्या रुपेश गांवस, तोखणायेचो विद्यार्थी अवनीश महादेव माजीक, तोखणायेचो खेळां विद्यार्थी आदित्य अजित वाडेकार हांचो भोवमान जालो.

संस्थेचे अध्यक्ष श्रीपाद गांवस आनी सरपंच दिक्षा गांवस हांणी ह्या वेळार आपले विचार मांडले. सुरवातेक शिक्षकांनी मानेस्तांक फुलांचे रोंपे भेटोवन येवकार दिलो. विवेकानंद ज्ञान मंदीर हायस्कुलाचे प्रभारी मुख्याध्यापक गोपीनाथ गांवस हांणी येवकार दिलो. शिक्षिका अस्मिता गांवस हांणी अहवाल वाचलो. विवेकानंद विद्यामंदिराची प्रभारी मुख्याध्यापिका नूतन मळीक हांणी सुत्रसंचालन केलें. शिक्षिका सुनंती झोरे हांणी उपकार मानले. मुखेल सोयरे प्रवीण हिरे परब हांकां श्रीपाद गांवस हांचे हस्तुकीं यादस्तीक भेटयलें. उपरांत विद्यार्थ्यांनी सांस्कृतीक आनी मनरिजवणेच्यो कार्यावळी सादर केल्यो.