शिक्षणाच्या माध्यमांतल्यान समाजांत फावो तो बदल घडोवन हाडपाक मेळटा

भांगरभूंय | प्रतिनिधी

प्रा. बाबाजी सावंत : स्पर्धात्मक प्रवेश परिक्षेक बसपी विद्यार्थ्यांक मार्गदर्शन

बऱ्या आनी उच्च दर्जाच्या शिक्षणांतल्यान आमी समाजांत फावो तो बदल घडोवन परिवर्तन करूंक शकतात. समाजांत शिक्षणाच्या मळार अशे तरेचें परिवर्तन करपाचें कार्य ‘चलो स्कूल मेगा ड्रायव्ह’ निश्चीतपणान करता अशें ‘चलो स्कूल मेगा ड्रायव्ह’चे वतीन आयोजीत केल्ल्या प्रशिक्षण वर्गाच्या समारोप सुवाळ्यांत विद्यार्थी आनी पालकांक मार्गदर्शन करतना मुखेल सोयरे प्रा. बाबाजी सावंत हांणी सांगलें.
बटूकाक स्मृती प्रतिश्ठानान बड्डें-मडगांवच्या सरकारी वाणिज्य आनी अर्थशास्त्र महाविद्यालयाच्या जोड पालवान जवाहर नवोदय विद्यालयाचे सवेच्या स्पर्धात्मक प्रवेश परिक्षेक बसपी विद्यार्थ्यांक मार्गदर्शन करपा खातीर 23 फेब्रुवारी 2022 ते 28 एप्रील 2022 मजगतीं प्रशिक्षण वर्गाचें आयोजन केल्लें.
सुरवातीक ‘चलो स्कूल मेगा ड्रायव्हाचे मुखेल संयोजक डॉ. गुणाजी सदानंद देसाय हांणी मुखेल सोयऱ्यांची वळख करून दितना प्रशिक्षण वर्गांत दर दिसाक खंयचीं कौशल्यां विद्यार्थ्यांनी आत्मसात केलीं हे विशीं माहिती दिली. दोन म्हयन्यां परस चड दीस चलिल्ल्या प्रशिक्षण वर्गांत कोंकण रेल्वेंतलें लोकोपायलट एम.एस. रेड्डी, लॉयॉला हायस्कूलची शिक्षिका लक्षिता देसाय, निलय देसाय आनी गुणाजी देसाय हांणी वेगवेगळ्या विशयां संदर्भांत विद्यार्थ्यांक मार्गदर्शन केलें.
एम. एस. रेड्डी हांणी ‘चलो स्कूल मेगा ड्रायव्ह’ शिक्षणाच्या माध्यमांतल्यान तळागाळांतल्या विद्यार्थ्यां मेरेन क्वालीटी एज्युकेशन पावोवन समाजांत आपले परीन सकारात्मक बदल घडोवन हाडपाचें कार्य करता देखून आपूण संस्थे कडेन समाजीक लागणुकेचे भावनेन वावर करपाक प्रेरीत जावन योगदान दितां म्हणपाचें सांगलें.
सरकारी महाविद्यालयाचे प्राचार्य गजानन मडीवाल हांणीय ह्या वेळार मार्गदर्शन केलें.
तशेंच उपस्थीत पालक आनी विद्यार्य्थांनी मनोगत उक्तायलें. ह्या वेळार लक्ष्मी हुग्गर, त्रिशा थापा, भुमिका लमाणी, डेलिसियो रोड्रीगीस, अभिषेक लमाणी, रिया रानी, ज्ञानेश्वरी अग्रे हांणी विद्यार्थ्यांचे वतीन जाल्यार जयराज लमाणी, श्रीमती शेख आनी श्रीमती अग्रे हांणी पालकांचे वतीन आपले विचार मांडले.
कार्यावळीचें सुत्रसंचालन निलय देसाय हांणी केलें जाल्यार लक्षिता देसाय हांणी उपकार मानले.