शिक्षकांनी गंभीर विचारवंत तयार करचे

भांगरभूंय | प्रतिनिधी

मुख्यमंत्रीः विद्यार्थ्यांचे नोकरे खातीर उद्देगीक कंपनीं कडेन कबलात

मडगाव: समाजांत आव्हानात्मक अडचणी उप्रासतना तांचें निराकरण करपा खातीर समालोचक विचारवंत जावपाची गरज आसा अशें मुख्यमंत्री डॉ. प्रमोद सावंत हांणी शुक्रारा व्ही एम साळगांवकार इन्स्टिट्यूट मानोरा राय हांगा राष्ट्रीय शिक्षणीक धोरण 2020 संदी, आव्हानां आनी फुडलो मार्ग ह्या राष्ट्रीय परिशदेच्या उक्तावण सत्रांत उलयतना सांगलें, आनी वर्गातील बुद्धिजीवी तयार करपाचें काम शिक्षकांक दिलें.

देशाची अर्थवेवस्था गतीन वाडत आसली तरी आमी शाश्वत विकासाचेर लक्ष केंद्रीत करपाक जाय. हे खातीर समाजाक उदयोन्मुख आव्हानांचेर उपाय सुचोवपा खातीर गंभीर विचारवंतांची गरज आसा अशें, सावंत हाणी सांगलें. ह्या आव्हानात्मक कार्या खातीर तांकां सुसज्ज करपा खातीर गंभीर विचारवंत तयार करप हें शिक्षक समुदायाचें काम आसा.

गोंयच्या बिगर-सरकारी म्हाविद्यालयांच्या प्राचार्य आनी वेवस्थापन प्रतिनिधींच्या मंचान आयोजीत केल्ल्या राष्ट्रीय शिक्षणीक धोरण (NEP) 2020: संदी, आव्हानां आनी फुडलो मार्ग ह्या राष्ट्रीय परिशदेच्या उक्तावण सत्रांत म्हाविद्यालयाच्या प्राचार्यांचे परिशदेंत मुख्यमंत्री सावंत उलयताले.

गोंय सरकारन विद्यार्थ्यांक प्रशिक्षण आनी प्लेसमेंट दिवपा खातीर उद्देगीक कंपनीं कडेन कबलात केल्या, आनी दर्जेदार शिक्षणीक संशोधन दिवपा खातीर गोवा स्टेट रिसर्च फावंडेशनची स्थापणूक केल्या.

गोंयांत गांवगिऱ्या वाठारांनी अद्वितीय परंपरीक ज्ञान प्रणाली आसा अशें सांगून सावंत हांणी ताचे दस्तावेजीकरण तयार करपाचे गरजेचेर भर दिलो. म्हाका सांगपाक खोशी भोगता कांय सरकारी संस्थां दस्तवेजीकरण प्रक्रियेंत वांटेकार जाल्यात. देखून विद्यार्थ्यांक तांचो इतिहासीक दृश्टीकोन आनी उपयुक्तताय समजुपाक मजत जातली अशें सावंत हांणी म्हणलें.

गोंय विद्यापिठाचे कुलगुरू हिरालाल मेनन हांणी ह्या वेळार उलयतना, 2023-24 सावन उच्च शिक्षणाच्या तिसऱ्या पांवड्यार राष्ट्रीय शिक्षणीक धोरण (NEP) 2020 ची अंमलबजावणी करपी गोंय हें एकसुरें राज्य आसपाक शकता.

हे एक फावट पुराय जाले उपरांत, आमी माध्यमीक आनी उच्च माध्यमीक पांवड्यार NEP क (अंमलबजावणीत) मजत करतले. , कारण NEP चो खरो फायदो मेळोवपा खातीर भुरग्यांक तळागाळांतल्यान नव्या शिक्षणीक प्रणालींतल्यान वच्चें पडटलें अशे मेनन हांणी सांगलें.