भांगरभूंय | प्रतिनिधी
खबरां संस्था
मुंबयः विधानसभा अध्यक्ष वेंचणुकेचे निमतान शिंदे-फडणवीस सरकारान पयली लडाय जिखले उपरांत आतां विस्वासदर्शक थाराव लेगीत जिखलो. राज्यपालांच्या निर्देशा प्रमाण दोन दिसांचें विशेश अधिवेशन आपयलां. पयल्या दिसा भाजपाच्या राहुल नार्वेकार हांची अध्यक्षपदार निवड जाले उपरांत विस्वासदर्शक थाराव मांडलो. ह्या वेळार शिंदे गट आनी भाजपान 164 मतां मेळोवन विस्वासदर्शक थाराव जिखलो. म्हाविकास अाघाडीक 99 मतां मेळ्ळी. जाल्यार तीन आमदार तटस्थ रावले.
हिंमत आसल्यार मध्यावधी वेंचणुको घेयातः ठाकरे हांचें आव्हान
हिंमत आसा जाल्यार मध्यावधी वेंचणुको घेवन दाखयात, अशें आव्हान शिवसेना पक्षमुखेली उद्धव ठाकरे हांणी शिंदे सरकाराक दिलां. भाजपाचो शिवसेनेक सोंपोवपाचो डाव आशिल्ल्याचो तांणी आरोप केलो.
फुडलें वेंचणुकेंत 200 उमेदवार वेंचून हाडटलोंः शिंदे
आमचे आनी भाजपाचे मेळून 165 आमदार आसात. फुडलें वेंचणुकेंत 200 आमदार वेंचून हाडटलो अशें मुख्यमंत्री एकनाथ शिंदे हांणी म्हणलें. शिवसेनेची काँग्रेस जावपाक दिवचे नात, अशें शिंदे हांणी म्हणलें. विस्वासदर्शक थारावा उपरांत सभाघरांत केल्ल्या भाशणांत एकनाथ शिंदे हांणी जायत्या मुद्यांचेर उलोवप केले.
अजीत पवार विरोधी पक्ष फुडारी
मुंबय: एकनाथ शिंदे हांच्या बंडाक लागून उद्धव ठाकरे हांच्या नेतृत्वा खालचें मविआ सरकार कोसळ्ळें. ते उपरांत आतां शिवसेनेचे सहकारी पक्ष राष्ट्रवादी आनी काँग्रेसीन विरोधी बांकाचेर बसपाची तयार केल्या. सत्तांतरा उपरांत विरोधी पक्ष फुडारी कोण हे विशीं चर्चा रंगताली. अखेर ह्या चर्चांक पूर्णविराम मेळ्ळां. आतां मेरेन 4 खेपे उपमुख्यमंत्री जाल्ले अजीत पवार विधानसभेचे नवे विरोधी पक्ष फुडारी आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
