भांगरभूंय | प्रतिनिधी
भांगरभूंय । प्रतिनिधी
म्हापशेंः समाज कल्याण मंत्री सुभाष फळदेसाय हांचे कडेन एका गाडेवाल्यान घातिल्ल्या वादा उपरांत बार्देशाच्या मामलेदारान शापोरा किल्ल्या सकल आशिल्ले गाडे मोडून उडोवपाचो आदेश दिल्या उपरांत गाळे कम दुकानवाल्यांनी स्वताच ती मोडपाचें काम केलें. फळदेसाय हांणी बुधवारा किल्ल्याक भेट दिली तेन्ना किल्ल्याच्या जीर्णोद्धाराक आडमेळे करपी गाळे मोडून उडोवपाची सूचोवणी संबंदितांक केल्ली.
मंत्री फळदेसाय हांचे कडेन अजय सिंग ह्या स्थलांतरीत गाडेवाल्यान वाद घातिल्लो. तांणी उपरांत बार्देश मामलेदाराक गाडे मोडून वडोवपाक सांगिल्लें. ते प्रमाण तांणी बिरेस्ताराक आदेश काडलो. मात गाडेवाल्यांनी स्वताच ते मोडपाचें शाणपण दाखयलें. बुलडोझर घालून गाडे मोडपाचें थारायल्लें. हणजूण- कांयसूंवचो पंचायत तलाठी गौरीश नायक, नवीन हडफडकार आनी सप्रेश पेडणेकार हांणी पुलिसांक वांगडा घेवन गाडेवाल्यांक नोटीस दिली.
बिरेस्तारा सांज मेरेन गाडेवाल्यांनी गाडे मोडून सुवात मेकळी केली. किल्या कडेन सुमार 90 गाडे कम दुकानां आशिल्ली. पंचायत मंडळाच्या आशिर्वादान किल्ल्या सकल मेकळे सुवातेंत हे गाडे उबे करपाचें काम केल्लें. ताका लागून किल्लो पळोवपाक येवपी पर्यटकांक आडमेळे जाताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
