भांगरभूंय | प्रतिनिधी
सुभाष फळदेसायः मंत्र्यां कडेन वाद घालपी गाडेकाराक अटक
भांगरभूंय । प्रतिनिधी
म्हापशें: शापोरा किल्ल्याचो सांबाळ करचे खातीर तशेंच पर्यटनाचे नदरेन उदरगत करचे खातीर जिर्णोद्धार करतले. तातूंत सरकाराक उत्पन्न तशेंच थळाव्या लोकांक स्वंयरोजगार मेळटलो, अशी म्हायती पुरातत्व खात्याचे मंत्री सुभाष फळदेसाय हांणी दिली.
मजगतीं, शापोरा किल्ल्याक भेट दिवपाक गेल्ले मंत्री फळदेसाय हांचे कडेन वाद घातिल्ल्या प्रकरणांत हणजूणें पुलिसांनी अजय सिंग (मूळ रा. राजस्थान) ह्या गाडेकाराक अटक केली. थळावी पंचायत तशेंच पुरातत्व खात्या वरवीं त्या वाठारांतले गाडे काडपाचो विचार सुरू आसा. ते फाटभुंयेर हो प्रकार घडलो.
बार्देश म्हाल भेटी वेळार मंत्री फळदेसाय हांणी दनपारां शापोरा किल्ल्याक भेट दिली. ह्या वेळार हो प्रकार घडलो. गाडे काडून आमच्या पोटाचेर पांय दिवपाचो कित्याक यत्न करता, असो प्रस्न विचारून दुबावितान मंत्र्यां कडेन वाद घातलो. ते उपरांत हणजूणें पुलिसांनी रोखडोच दुबाविताक ताब्यांत घेवन अटक केली.
किल्ल्याचें मूळ बांदकाम आनी सौंदर्याक कसलीच आडखळ हाडिनासतना हें काम हातांत घेतले. रेव्हेन्यू मॉडलाचेर हो जिर्णोद्धार प्रकल्प आसतलो. ह्या प्रकल्पांत किल्ल्याच्या मुळा डेन आशिल्ले गाडे आडखळ हाडपाक शकतात. ताका लागून ते पंचायत मंडळ आनी आमदारांक विस्वासांत घेवन काडटले, अशें मंत्री फळदेसाय हांणी स्पश्ट केलें. ह्या वेळार आमदार डिलायला लोबो, सरपंच लक्ष्मीदास चिमुलकार, पुरातत्व खात्याचे संचालक निलेश फळदेसाय, पंचायत वांगडी, अधिकारी आनी थळावे लोक हाजीर आशिल्ले.
बेतीचे फेरीसेवेचेर उपाय काडटलेः फळदेसाय
बेती फेरी धक्क्या वयली फेरीबोट सेवा नेमान खंडीत जाता, अशी कागाळ थळाव्या पंचायत मंडळ आनी लोकांची आसा. ताचेर उपाय काडटले. तशेंच हंगामी आलाशिरो शेड, शौचालय आनी हेर सुविधा प्रवाशांक दितले. रेईश मागूश किल्ल्याचेर लेगीत आधुनीक सुविधा दितले, अशी म्हायती मंत्री सुभाष फळदेसाय हांणी दिली. हे भेटी वेळार तांचे वांगडा आमदार केदार नायक आनी पंचायत मंडळ हाजीर आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
