भांगरभूंय | प्रतिनिधी
नागेशी पातळ्ळी दुख्खाची सया; सुदिन ढवळीकारान उक्तायलें दुख्ख
फोंडें: नागेशीं-बांदोडेंचे नामनेचे नाट्य कलाकार आनी दिग्दर्शक शशिकांत नागेशकार (63) हांकां पंढरपूर हांगा चलत वता आसतना काल (बुधवारा) दनपारां काळजाच्या आताकान मरण आयलें. शशिकांत हांच्या मरणाक लागून नाट्य मळार दुख्खाची सया पातळ्ळ्या. शशिकांत नागेशकार हांच्या मरणाक लागून वीज मंत्री सुदिन ढवळीकार हांणी दुख्ख उक्तायलां.
आषाढी एकादशीचे वारीत वांटेकार जाल्ले शशिकांत नागेशकार आनी हेर वारकरी पंढरपूरा पावपाक फक्त स किलोमिटर पयस आशिल्ले. बुधवारा दनपारां चलत वता आसतना शशिकांत नागेशकार जमनीर कोसळ्ळे. हेर वारकऱ्यांनी लागींच आशिल्ल्या हॉस्पिटलांत दाखल करचे पयलींच तांकां मरण आयलें.
मरण आयिल्ल्याची खबर नागेशी गांवांत पातळटकूच सगली कडेन दुख्खाची सया पातळ्ळी. वीज मंत्री सुदिन ढवळीकार हांकां म्हायती मेळटकूच तांणी स्वता पंढरपूरा संपर्क सादून कूड गांवांत हाडपा खातीर यत्न सुरू केल्यात.
नाट्य मळार जीव ओतून घेतिल्ल्या शशिकांत नागेशकार हांणी नोकरी सोडिल्ली. फाटल्या तीन-चार वर्सांत तांणी दिग्दर्शीत केल्ल्या ‘ही श्री ची ईच्छा’, ‘अहं देवयानी’, ‘शिव गोमंतक’, ‘कट्यार काळजात घुसली’ ह्या नाटकांचो आस्पाव आसा. तशेंच तांकां खूबशा नाटकांनी इनामां फावो जाल्यांत. वीज मंत्री सुदिन ढवळीकार हांणी कांय दिसां पयलीं शशिकांत नागेशकार आनी तांच्या वांगड्यांचो एके खाशेले कार्यावळींत भोवमान केल्लो.
वीज मंत्री सुदिन ढवळीकार हांणी म्हणलें, हो एक बरो कलाकार, दिग्दर्शक, मुर्तीकार. आपलें वैयक्तीक तशेंच गोंयचे कलेचें लुकसाण जालां. मगो पक्षाचो एक ज्येश्ठ तशेंच विस्वासू कार्यकर्तो म्हूण तांणी पक्षा खातीर व्हड योगदान दिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
