व्हेलेन्टायन दिसाच पाळोळें दर्यांत मेळ्ळी तरणाटी- तरणाट्याची कूड दोगांय उत्तर प्रदेशांतलीः दर्यांत बुडन मेल्ल्याचो अदमास

पाळोळें दर्यांत बुडल्लें सुप्रिया दुबे आनी विभू शर्मा

भांगरभूंय | प्रतिनिधी

भांगरभूंय । प्रतिनिधी
काणकोणः मंगळारा व्हेलेन्टायन दिसा पाळोळें दर्यांत काणकोण पुलिसांक एक तरणाटी आनी एका तरणाट्याची कूड मेळ्ळी. तांकां दर्यांत बुडून मरण आयिल्ल्याचो मुळावो अदमास आसा. गाझियाबाद- उत्तर प्रदेशांतली सुप्रिया राजेश दुबे (26) आनी विभू शर्मा (27) अशी तांची वळख पटल्या. दोगांत सोयरीं आसात. सुप्रिया बंगळुरूक आयटी कंपनीक कामाक आशिल्लें जाल्यार विभू मुंबयत सिनेमा मळांत आशिल्लो.
सुप्रिया दुबे बंगळुरूंतल्यान जाल्यार विभू शर्मा मुंबयच्यान आयतारा पाळोळें आयिल्लो. दोगू जाण पाळोळेंच्या एका हॉटेल-कम रेस्टॉरन्टांत राविल्लीं. सोमाराक सकाळीं 11 वरांचेर ते हॉटेल सोडून दुसऱ्या हॉटेलांत रावपाक गेल्लीं. सोमाराक राती सुप्रिया व्होवरेंच्या दर्यांत गेल्ले कडेन तें बुडपाक लागलें तें पळोवन ताका वाटावपाक गेल्लो विभू  बुडलो अशी शक्यताय काणकोण पुलिसांनी उक्तायल्या.
पुलिसांक मंगळारा सकाळीं 7 वरांचेर सुप्रियाची कूड आनी मोबायल मेळ्ळो.  ताचे वयल्यान विभूचो नंबर पुलिसांक मेळ्ळो. विभूच्या नंबराचेर फोन लायलो तेन्ना मोबायल स्वीच ऑफ मेळपाक लागलो. ताका लागून पुलिसांक दुबाव आयलो मात दनपारां पावणे दोनाच्या सुमाराक दर्यांत पेंवपाक गेल्ल्या एका विदेशी पर्यटकाक विभूची कूड दर्यांत दिसली. ताणे पुलिसांक म्हायती दितगीर लायफ गार्डाचें मजतीन तांणी कूड दर्या देगेर हाडली.
दोगांच्याय मोबायल नंबरां वयल्यान काणकोण पुलिसांनी तांच्या घरच्यां कडेन संपर्क सादलो. ताचे सोयरे बुधवारा सकाळी गोंयांत पावतले अशें पुलिसांनी सांगलें. सध्या दोनूय कुडी मडगांवच्या दक्षीण गोंय जिल्हो हॉस्पिटलाच्या मोर्गांत दवोरल्यात. पुलीस उपअधिक्षक संदेश चोडणकार हांच्या मार्गदर्शना खाला काणकोणचो निरीक्षक चंद्रकांत गांवस तपास करता. पोस्ट मॉर्टेमा उपरांत ह्या प्रकरणाचेर चड उजवाड पडपाक शकतलो अशें गांवस हांणे सांगलें.