वेळसांवां तणाव; रेल्वेचें काम आडायलें

भांगरभूंय | प्रतिनिधी

मुरगांवचे उपजिल्होधिकारी फाल्यां भेट दिवन करतले चर्चा

वास्को: वेळसांव थळाव्यांचे खाजगी सुवातेंत रेल्वे विकास निगम अतिक्रमण करून बांदकाम करीत आशिल्ल्याचो दावो करून हाजीर आशिल्ल्या नागरिकांनी रेल्वे विकास निगमाच्या कामगारांक काम करपा पसून आडायले. ताचे पयलीं आपले जमनींत रेल्वेन अतिक्रमण केल्ल्याचो दावो करून बॅरिकेड्स उबारपी शार्लीन बार्रेटो हांचें काम पुलिसांनी बंद उडयिल्ल्यान कांय काळ तणावाची परिस्थिती निर्माण जाली. थंय कायदो आनी सुवेवस्थेचो प्रस्न निर्माण जावचो न्हय हे खातीर व्हड प्रमाणांत पुलीस तैनात केल्ले. थंयच्या वादाची दखल घेवन मुरगांवचे उपजिल्होधिकारी 13 तारखेक सकाळीं इकरा वरांचेर भेट दिवन पळोवणी करपाचें थारायलां. ह्या वेळार ते संबंदीत लोकां बरोबर आनी रेल्वे विकास निगमाच्या अधिकारी वर्गा बरोबर चर्चा करतले.

वेळसांव रेल्वे विकास निगम आनी थळाव्यां मदीं वाद जावपाचे प्रकार सेगीत घडत आसात. रेल्वे विकास निगमाचो कंत्राटदार कसलीच वर्क ऑर्डर, कागदपत्रां बगर काम करता. तशेंच थंयचे खाजगी सुवातेंत ते अतिक्रमण करीत आशिल्ल्याचो दावो संबंदीत रहिवाशी करीत आसात.

ह्या प्रकरणांत रहिवाशी आनी भाटकारान वेळसांव पंचायती कडेन कागाळ केले उपरांत सरपंचान रेल्वेक काम बंद करपा संबंदी नोटीस जारी केली. मजगतीं रेल्वेच्या कंत्राटदारान काम सुरूच दवरलें. कंत्राटदाराचे कामगार खाजगी सुवातेंत येवन काम करूंक लागिल्ल्यान थळाव्यांनी तिडक उक्तायली.

पुलिसांनी श्रीमती बार्रेटो हांचें काम बंद उडयिल्ल्यान थळाव्यांनी निरशेणी उक्तायली. बुधवारा सकाळीं थंय जमिल्ल्यां मदीं आदल्यो आमदार एलिना साल्ढाणा, ओलंसियो सिमोयश, गोंयचो एकवोटचे ओर्वील दोरादो बी हांचो आस्पाव आशिल्लो. थंय तणावाची परिस्थिती निर्माण जाल्ल्यान वास्कोचे उपअधिक्षक सलीम शेख, वास्कोचे निरिक्षक कपील नायक, वेर्णेंचे निरिक्षक डायगो ग्रासिएस हजर आशिल्ले.

ह्या वेळार सलीम शेख हांणी मध्यस्ती करून शांतताय हाडली. तांणी मुरगांवचे उपजिल्होधिकारी कचेरेक सगली म्हायती दिले उपरांत उपजिल्होधिकाऱ्यान दोन दिसांनी थंय पळोवणी करपाचें थारायलें.

रेल्वे विकास निगमान जमीन संपादन करूंक नाशिल्ले जमनीचेर अतिक्रमण करपाक सुरवात केल्या. कंत्राटदारा कडेन कसलीच कागदपत्रां नात. थळावे पंचायतीची बांदकामा संबंदी परवानगी घेवपाची गरज नाशिल्ल्याचें कंत्राटदार सांगतात अशें थळाव्या लोकांनी सांगलें. पुलिसांच्या म्हऱ्यांत कांय लोकांनी ह्या कंत्राटदाराक ते सुवातेर कसलें बांदकाम करतले अशें विचारल्यार ताणें थंय रेल्वे ट्रॅकाचें दोट्टीकरण करतले अशें सांगलें. ताका लागून रेल्वे ह्या कामाची म्हायती कित्याक लिपयता असो प्रस्न दोरादो हांणी उप्रासायलो.

जमनीचो प्रस्न न्यायालयांत प्रलंबीत आसून लेगीत रेल्वेन कामाक सुरवात केल्या. खाजगी सुवातेंत अतिक्रमण करून रातच्या वेळार ते काम करतात. ते खणपाच्या कामा खातीर मशिनरी वापरीत आशिल्ल्यान लागींच्या घरांक ताचो फटको बसत आशिल्ल्याचें दोरादोन स्पश्ट केलें. उपजिल्होधिकाऱ्यान थंय प्रत्यक्ष भेट दिवन पळोवणी करची. आमी कायदो हातांत घेनात. पूण फाल्यां एखादी गजाल घडून कायद्याचो प्रस्न निर्माण जायत जाल्यार ताका आमी जापसालदार नात अशें तांणी सांगलें.

सिमोयश हांणी लेगीत रेल्वेचे भुमिके विशीं तिडक उक्तायली. जमीन संपादन करपाची प्रक्रिया अजून पुराय जाल्ली ना. ती पुराय जावंदी, वर्क ऑर्डर हाडात मागीरूच कामाक सुरवात करात अशें तांणी सांगलें. रेल्वे खाजगी जमनितूय अतिक्रमण करून बांदकाम करता. तांकां कसलेच दाखले लागनात काय कितें असो प्रस्न तांणी उपस्थीत केलो. अतिक्रमण करपी रेल्वेच्या कंत्राटदारा आड कारवाय जावपाची गरज तांणी उक्तायली.

एलिना साल्ढाणा हांणी आपलो दोट्टीकरणाक विरोध कित्याक आसा हें स्पश्ट केलें. हांगा दोनशें ते तिनशें वर्सां पयलींचीं घरां आसात. ती दायजदळां आसात. दोट्टीकरणाक लागून तीं नानपयत जातलीं. तशेंच पर्यावरणाचेर परिणाम जावपाची भिरांत आसा. ह्या प्रकरणांत आपूण हाचे पयलीं मुख्यमंत्री डॉ. प्रमोद सावंत, मंत्री निलेश काब्राल हांकां आपोवन तांकां सत्य परिस्थिती दाखयिल्ली. पूण मुखार कांयच घडूंक नाशिल्ल्याचें तांणी सांगलें.