भांगरभूंय | प्रतिनिधी
-खण वेवसाय बेगिनूच सुरू जावपाची आस्त
पणजी: खर अटीं सयत केंद्रीय पर्यावरण मंत्रालयान लामगांवच्या खण ब्लॉकाक पर्यावरणी दाखलो (ईसी) मंजूर केला. पावणी जाल्ल्या खण ब्लॉकां मदीं पर्यावरणी दाखलो मेळिल्लो हो पयलो ब्लॉक आसा. हाका लागून बंद आशिल्लो खण वेवसाय बेगीन सुरू जावपाची आस्त निर्माण जाल्या.
लोकांच्या येरादारी खातीर बायपास रस्ते, रानवटी प्राण्यांचेर नदर दवरपा खातीर कॅमेरा, पर्यावरण प्रयोगशाळा उबारपाच्यो अटी दाखल्यांत आसात. तशेंच म्हालाचे येरादारी खातीर 10.5 टन तांकीचे बदला 25 टन म्हाल तांकीचे ट्रक वापरपाची अट आसा.
———-
पर्यावरणी दाखल्याच्यो अटी
– प्रकल्प धारकान हवा, आवाज, उदक प्रदुशणाचें सेगीत मेजमाप करपाक जाय. उदकाच्या पातळेचें प्रमाण राखपाची गरज. ब्लास्टींग तशेंच क्रशर वापरपाच्या थळाचेर कंपनाचे (व्हृायब्रेशन) मेजमाप करप गरजेचें. सगलीं आंकडेवारी पर्यावरणी मंत्रालयाच्या प्रादेशीक कार्यालयांत तीन म्हयन्यांनी दिवपाक जाय.
– भौशीक सुनावणे वेळार उपस्थीत केल्ल्या उपाय येवजण्यांची कार्यवाही 3 वर्सात जावपाक जाय. 309.3 लाखांचो नियोजीत निधी लेगीत 3 वर्सांत वापरपाक जाय.
– सिंगल यूज प्लास्टीक बंदीचेर जागृताय करपाक जाय. फोट्यां सयत हो अहवाल 6 म्हयन्यांनी सादर करपाक जाय.
– पर्यावरणाच्या जतनाये खातीर 72 कोटींची तजवीज आसा. हाचो योग्य वापर करून पर्यावरणाच्या जतनाये खातीर उपाय येवजण करपाक जाय
– खण थळाचेर पर्यावरण प्रयोगशाळा स्थापन करपाची गरज आसा. केमिस्ट, अभियंते हांची नेमणूक करून हवा, उदकाच्या प्रदुशणाची तपासणी सेगीत करची.
– प्रकल्प धारकांनी डिझेल बदला उण्यांत उणें 20 टक्के इलेक्ट्रीक/सोलर वाहनांचो वापर करपाचो यत्न करचो.
– जमनींतले उदक पंपींग करतना संबंदींत यंत्रणेची मान्यताय घेवची. ही मान्यताय घे मेरेन प्रदुशण नियंत्रण मंडळान ‘कंसेंप्ट टु ऑपरेट’ परवानो दिवपाक जायना.
– प्रकल्प धारकान तरणाट्यांक विद्यावेतन दिवन कुशळटायेचें प्रशिक्षण दिवपाक जाय. नोकरेंत थळाव्या लोकांक प्राधान्य दिवपाक जाय.
– खण कामागारांच्या भलायकेचे रेकॉर्ड दवरपाक जाय. थळाव्या लोकां खातीर भलायकी शिबिरां आयोजीत करपाक जाय.
– खण बंद जाली काय ती जमीन शेतीक योग्य थारतली, अशें स्थितींत हाडपाक जाय. हाचे कार्यवाहीचो अहवाल सादर करचो पडटलो.
—————
म्हाल कडपाच्या प्रमाणा खातीर मान्यताय
सर्वोच्च न्यायालयान पुराय राज्या खातीर वर्साक 20 दशलक्ष टन म्हाल काडपाचें प्रमाण निश्चीत केलां. प्रकल्प धारकान ह्या ब्लॉकांतलो म्हाल काडपा खातीर प्रमाणाची मान्यताय घेवपाक जाय.
खण ब्लॉकाची शिम केंद्रीय पर्यावरण मंत्रालया कडल्यान निश्चीत करपाक जाय. येरादारी खातीर कन्व्हेयर बेल्ट पद्दतीचो वापर करपाक जाय.
म्हाल काडले उपरांतच्या खणींत उदकाचो सांठो, उदका खेळ, नुस्तें पोसप हे सारक्यो कार्यावळी सुरू करपाक जाय. खण ब्लॉकाच्या कुशीक आशिल्ल्या दिवचल आनी अस्नोडें न्हंयेच्या उदकाच्या प्रदुशणाची नेमीत तपासणी जावपाक जाय.
लोकांच्या येरादारी खातीर अंडरपास तशेंच बायपास रस्त्यांची उबारणी जावपाक जाय. खणी कुशीक पर्यावरणाचे जतनाये खातीर झाडां लावप गरजेचें.
जनावरां खंय भोंवतात आनी कशी आसात, हे कळपा खातीर राना खात्याच्या सहकार्यान कॅमेरा बसोवपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
