भांगरभूंय | प्रतिनिधी
भारत आनी येजमान वॅस्ट इंडीज ह्या पंगडां मदीं तीन वन डे मॅचीचे माळेंतली पयलीं मॅच आयज त्रिनिदादांत जातली. सदचो मुखेली रोहीत शर्माचे गैरहाजेरेंत दावखुरो ओपनर बॅट्समन शिखर धवन करतलो. निवड समितीन रोहीत शर्मा सयत आदलो मुखेली विराट कोहली, हार्दिक पांड्या, जसप्रीत बुमरा, ऋषभ पंत ह्या सिनीयर खेळगड्यांक विसव दिला. इतके सिनीयर खेळगड्यांचे गैरहाजेरेंत लेगीत वॅस्ट इंडिजा आड भारताचें जैत जड दिसता.
इशान किशन, ऋतुराज गायकवाड, शुभमन गिल, संजू सॅमसन, श्रेयश अय्यर आनी दीपक हुड्डा सारक्या खेळगड्यांक वन डे क्रिकेटींत आपली प्रतिभाची झलक दाखोवपाची भांगराळी संद आसा.
वॅस्ट इंडिजाचे बॅट्समन फॉर्मांत ना, तांच्या आड बॉलर वेंचपाचे साबार पर्याय भारता कडेन आसात. हार्दिक पांड्याचे गैरहाजेरेंत शार्दुल ठाकूराक अश्टतासांचो खेळगडो म्हणून संद दिवपाची शक्यताय आसा. अर्शदीप सिंग पोटाचे समस्ये कडेन झुजता. तो पुर्ण बरो जावंक ना जाल्यार प्रसिद्ध कृष्णा आनी मोहम्मद सिराज वा आवेश खान हातूंतल्या दोग फास्ट बॉलरांक खेळपाक शकतात.
दुसरे वटेन बांगलादेशा आड स्वताच्याच घरच्या मैदानांत वन डे माळ 0-3 फरकान हारपी वॅस्ट इंडिजाचो लेगीत आत्मविस्वास उणो जाला. हे फाटभुंयेर अश्टतासांचो खेळगडो जेसन होल्डराचें पुनरागमन जालां. नॅदरलॅण्ड, पाकिस्तान आनी बांगलादेश ह्या पंगडां आड जाल्ल्या माळां खातीर ताका विसव दिल्लो.
होल्डराच्या पुनरागमना उपरांत वॅस्ट इंडिजाचो आत्मविस्वास वाडपाक मजत जावये. वॅस्ट इंडीज फाटल्या कांय मॅचींनी पुर्ण 50ओव्हरी लेगीत खेळपाक शकूंक ना. तशेंच ताका व्हड भागिदाऱ्यो लेगीत करपाक शक्य जावंक ना.
2019चे संवसारीक सर्ती उपरांत वॅस्ट इंडीज 39 मॅची खेळ्ळ्यात. तातूंतल्यो फक्त स मॅचींनी पुर्ण 50 ओव्हरी खेळपाक विंडिजाक शक्य जालां. हो पंगडा खातीर हुस्क्याचो विशय आसा.
हातूंतल्यान वॅस्ट इंडीज पंगड स्वताक भायर काडपाचो यत्न करतलो.
शिखर धवना वांगडा डावाची सुरवात कोण करतलो हें अजून निश्चीत जावंक ना. शुभमन गिलाचें पंगडांत पुनरागमन जालां. ताचे खेरीत ईशान किशन आनी ऋतुराज गायकवाड हांकां लेगीत धवना वांगडा डावाची सुरवात करपाची संद आसा.
पंगड वेवस्थापनाक मदले फळयेंतल्या खेळगड्यांची निवड करपाक मात्शे यत्न करचे पडटले. उत्कृश्ठ फॉर्मांत आशिल्लो हुड्डा तिसरे सुवातेर खेळपाक शकता. सुर्यकुमार यादवाची लेगीत निमाण्या इकरांतली सुवात निश्चीत आसा. ताका लागून संजू सॅमसन वा श्रेयस अय्यर हातूंतल्या एकल्याची निवड करची पडटली.
अय्यराचेर चेपण आसतलें इंग्लंडांत शॉर्ट पीच बॉल खेळटना ताचेर मर्यादा येता हें स्पश्ट जालां.
खेळपट्टी स्पिनरांक मजत करपाची शक्यताय आसा. ताका लागून युजवेंद्र चहल आनी रवींद्र जडेजा हे तिनूय मॅचींनी खेळपाक शकतात. अक्षर पटेल तिसऱ्या स्पिनराच्या रुपान पर्याय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
