भांगरभूंय | प्रतिनिधी
भांगरभूंय I प्रतिनिधी
पणजी : राज्य सरकाराच्या वीज दरवाडीच्या प्रस्तावाक विरोधी पक्षां सयत उद्देजकांनी लेगीत विरोध केलो. घरगुती तशेंच हेर सगळ्या वापरा वयल्या विजेचे दर 6 टक्क्यांनी वाडोवपाचो प्रस्ताव आसा. जोड वीज नेमन आयोगा मुखार बुधवारा भौशीक सुनावणी जाली.
गोंयांत एप्रील सावन विजेचे दर वाडोवपाचो प्रस्ताव आसा. ह्या प्रस्तावाक कायद्या प्रमाण जोड वीज नेमन आयोगाची (जेईआरसी) मान्यताय घेवची पडटा. हे मान्यताये खातीर जोड वीज नियमन मंडळान पणजे भौशीक सुनावणी घेतली. ह्या वेळार काँग्रेस, गोवा फॉरवर्ड, आप तशेंच गोंय चेंबरान विरोध केलो.
कायद्या प्रमाण वीज दरवाडीच्या
प्रस्तावाचो विचार जातलो : जेईआरसी
गोंय सरकारान वीज दरवाडीचो प्रस्ताव सादर केला. नेम तशेंच मार्गदर्शक तत्वां प्रमाण वीज दरवाडीच्या प्रस्तावाचो विचार जावन निर्णय जातलो. राजकी पक्ष तशेंच संघटणांच्या सुचोवण्यांचो आयोग विचार करतलो. वीज खात्याची येणावळ तशेंच खर्चाचो विचार जातलो. सगळो विचार करून दरवाडीचेर निर्णय जातलो, अशें जोड वीज नियमन आयोगाचे वांगडी ज्योती प्रसाद हांणी सांगलें.
वीज दरवाड उद्देगांक परवडपी ना : गोंय चेंबर
कोवीड उपरांत निर्माण जाल्ली उद्देगीक मंदी अजुनूय आसा. उद्देगांची स्थिती बरी ना. हाका लागून उद्देगांक वीज दरवाड परवडपी ना. वीज खात्याचो 2012 उपरांतचो लेखा अहवाल उपलब्ध ना, अशें गोवा चेंबरान सुनावणी वेळार स्पश्ट केले.
निती आयोगान उक्तायला विजेच्या दराचेर हुस्को : गोवा फॉरवर्ड
गोवा फॉरवर्डान प्रस्तावीत वीज दरवाडीक विरोध केलो. निती आयोगान 2022 वर्सा अहवाल सादर केल्लो. गोंयांत विजेचे दर चड आसात. वीज दरा विशीं निती आयोगान हुस्को उक्तायला. गोवा फॉरवर्डाचे दुर्गादास कामत आनी मोहनदास लोलयेंकार हांणी वीज दरवाडीक विरोध करपी निवेदन भेटयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
