भांगरभूंय | प्रतिनिधी
युरी आलेमांवः राज्यसभे खातीर कॉँग्रेसीचे नेटान यत्न, गोवा फॉरवर्ड, आरजीचें अजून थारूंक ना
भांगरभूंय । प्रतिनिधी
पणजीः राज्यसभा वेंचणुकेची तारीख जाहीर जाल्ल्यान राज्यांतले विरोधी पक्ष आतां ल्हवू ल्हवू जागे जावपाक लागल्यात. काँग्रेस, गोवा फॉरवर्ड, आप आनी आरजी ह्या विरोधी पक्षां वतीन एकसुरो उमेदवार आसतलो. विरोधकां वतीन एकूच उमेदवार आसचो हे खातीर आपूण हेर पक्षांच्या आमदारांच्यो भेटी घेतलों, अशें विरोधी पक्ष फुडारी युरी आलेमांव हांणी सांगलें.
राज्यसभा खासदार विनय तेंडुलकार हांचो कार्यकाळ 28 जुलयाक सोंपता. ताचे पयलीं 24 जुलयाक राज्यसभेच्या सुवाते खातीर मतदान जातलें. सत्ताधारी भारतीय जनता पक्षान उमेदवाराची औपचारीक घोशणा करूंक नासली तरी प्रदेश अध्यक्ष सदानंद शेट तानावडे हांची उमेदवारी निश्चीत जाल्या. तांच्या नांवाचेर केंद्रीय फुडाऱ्यांनी म्होर लायिल्ल्याची म्हायती गोपांनी दिली. पक्ष जी जापसालदारी दिता, ती घेवपाची आपली तयारी आसा, अशें अध्यक्ष सदानंद तानावडे हांणी सांगलें.
जुलयाच्या पयल्या सप्तकांत बसका
पावसाळी अधिवेशन 18 जुलय सावन सुरू जाता. अधिवेशनाची व्यूहरचना थारोवपा खातीर विरोधी पक्ष फुडारी ह्या नात्यान आपूण आरजी, गोवा फॉरवर्ड, आप आमदारांक मेळपाचो आसा. ह्या वेळार राज्यसभा उमेदवारीचेर चर्चा जातली. सत्त्ताधारी भाजपाचे तुळेंत आमचे संख्याबळ उणें आसा. भाजप उमेदवाराक लडत दिवपा खातीर विरोधकांचो एकसुरो उमेदवार आसपाक जाय. ह्या मुद्द्याचेर आपूण हेर पक्षांच्या आमदारां कडेन उलयतलों. पक्षा कडेन चर्चा करून काँग्रेसीची भुमिका निश्चीत जातली, उपरांत हेर पक्षांच्या आमदारां कडेन उलोवणी जातली, अशें युरी आलेमाव हांणी सांगलें. जुलयाच्या पयल्या सप्तकांत हेर पक्षांच्या आमदारां कडेन चर्चा जातली. उपरांत उमेदवार थारतलो, अशेंय तांणी सांगलें.
अजून भुमिका निश्चीत ना : आरजी
भुंयपुतांक न्याय दिवपा सयत गोंयचें हीत सांबाळपाक रिव्होल्युशनरी गोवन्स पक्षाचें सर्वोच्च प्राधान्य आसा. राज्यसभा वेंचणुकेंत स्वतंत्र उमेदवार दवरचो काय विरोधकांच्या उमेदवाराक तेंको दिवचो, तें अजून थारूंक ना. पक्षाची फुडल्या सप्तकांत बसका जातली. हे बसकेंत राज्यसभा वेंचणुकेचेर चर्चा जातली, अशें आरजीचे मुखेली मनोज परब हांणी सांगलें. आरजी हो हेर पक्षां परस वेगळो पक्ष आसा. वेगळेंपण सांबाळपाचो यत्न कायम आसतलो, अशें मनोज परब हांणी सांगलें.
केंद्रीय फुडाऱ्यांच्या धोरणां प्रमाण निर्णयः वेंझी व्हिएगस
आम आदमी पक्ष हो राष्ट्रीय पक्ष आसा. केंद्रान उमेदवार दवरपाचो आदेश दिलो, जाल्यार आमचो स्वतंत्र उमेदवार आसतलो. उमेदवार दवरपाचो आदेश दिवंक ना जाल्यार दुसऱ्या उमेदवाराक तेंको दितले. केंद्राच्या धोरणा प्रमाण आमचो निर्णय जातलो. भाजपाचे आमदार चड आसात. आमचे दोनूच आमदार आसात. राज्यांत विरोधकां कडेन संख्याबळ ना. केंद्रीय फुडाऱ्यांच्या सल्ल्या प्रमाण आमची व्यूहरचना थारतली, अशें आपाचे आमदार वेंझी व्हिएगस हांणी सांगलें.
भाजपा आड सगळे विरोधी पक्ष एकठांय येवपाच्यो हालचाली सुरू आसात. हाचो राज्यसभा वेंचणुकेचेर लेगीत परिणाम जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
