भांगरभूंय | प्रतिनिधी
भांगरभूंय । प्रतिनिधी
पेडणेः मांद्रेचो आमदार जीत आरोलकार हांणी मीस डेफ इंडिया सर्ज जिखपी विनिता शिरोडकाराचो ताच्या कांचोळेवाडो- मोरजी हांगच्या घरा वचून भोवमान केलो. ह्या वेळार ताणे ताका आपल्या कार्यालयांत काम करपाची ऑफर दिवन ताका सरकारी नोकरी मेळोवन दिवपाचें आस्वासन दिलें. विनिताक उलोवपाक आनी आयकुवपाक येना. देश पांवड्यार जायत्या सर्तींत वांटो घेवंन ताणे इनामां मेळयल्यांत.
विनिता शिरोडकाराचे आवयन जिद्द आनी मेहतन करून ताका पर्वरीच्या संजय स्कुलांत बारावे मेरेन शिकयलें. विनिताक ल्हानपणा सावस चित्रकला, नाच आनी खेळाची आवड आसा. विनिताच्या वाड्या मेरेन वचपाक रस्तो ना. भाटकारा कडेन उलोवणी करून रस्तो बांदपाक जमीन मेळोवपाचो आपूण यत्न करतलों अशें आरोलकारान शिरोडकार कुटूंबाक सांगलां.
मोरजेत एका गाड्यांत भजी- मिरजी विकून विनिताची आवय संवसाराचो गाडो चलयता. विनिताक सरकारी नोकरी मेळ्यार तागेल्या आवयक बरो आदार मेळटलो. जीत आरोलकारान सध्या विनिताक आपल्या कार्यालयांत काम दिवपाची तयारी दाखयल्या. उपरांत सरकारी नोकरी मेळोवन दिवपा खातीर यत्न करतलों अशें तांणे पत्रकारांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
