भांगरभूंय | प्रतिनिधी
कायदो तज्ञांनी मांडलीं वेगळींवेगळीं मतां
पणजी : पंंचायत वेंचणूक 12 ऑगस्टाक जावप निश्चीत जाल्ल्यान विधानसभा अधिवेशना विशीं दुबाव निर्माण जाला. सरकारान 11 जुलय ते 12 ऑगस्ट मेरेन अधिवेशन घेवपाचें थारायलांं. आचारसंंहितेक लागून अधिवेशन जातलें? हो प्रस्न आसा. कायद्यान अधिवेशन घेवपाक कसलीच आडखळ ना अशें कायदो तज्ञांचें मत आसा.
पंंचायत वेंचणूक आचारसंंहिता ही त्या, त्या पंंचायत वाठारांत आसतली. आचारसंंहितेचो अधिवेशना कडेन संंबंंद ना. आचारसंंहिता आसली तरी अधिवेशन घेवपाक कायद्यान कसलेंच बंंधन ना. खंंडपिठान पंंचायत वेंचणुके विशीं जो आदेश दिला, तातूंत अधिवेशना विशीं उल्लेख ना. हाका लागून थारिल्ले प्रमाण अधिवेशन जावपाक हरकत ना, अशें अॅड. क्लिओफात कुतिन्हो आल्मेदा हांंणी सांंगलें.
विधानसभा अधिवेशन जाय तेन्ना घेवपाचो सरकाराक अधिकार आसा. अधिवेशन घेवपाक कायद्याची कसलीच आडखळ ना. पंंचायतींं विशीं नव्यो घोशणा वा येवजण्यो जाहीर न करप योग्य जातलें अशें आदले केंद्रीय मंंत्री अॅड. रमाकांंत खलप हांंणी सांंगलें.
पंंचायत वेंचणूक आचारसंंहिते वेळार अधिवेशन जावपाक हरकत ना. तरी अधिवेशन फुडें धुकलप सरकाराक शक्य आसा, अशें अॅड. एस. एन. जोशी हांंणी म्हणलां. पंंचायत वेंचणूक याचिकेंत अॅड. जोशी हांंणी राज्य वेंचणूक आयोगाची बाजू मांंडिल्ली.
अधिवेशनांत तरेकवार घोशणा जातात. अनेक प्रस्तावांचेर चर्चा जाता. हाका लागून आचारसंंहितेचो भंंग जावपाची भिरांंत आसता. हाका लागून अधिवेशन घेवप बरोबर जावचें ना, सरकारान अजून मेरेन म्हजे कडेन सल्लो मागूंक ना, अशें अॅडव्होकेट जनरल देविदास पांंगम हांंणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
