भांगरभूंय | प्रतिनिधी
म्हापश्यां वॉशींग सेंटरांत दुर्घटणा
भांगरभूंय । प्रतिनिधी
म्हापशें: पेडें म्हापशेंच्या वॉशींग सेंटरांत विजेचो शॉल लागून कामगाराक मरण आयलें. परशुराम लमाणी (26, रा. गणेशनगर कोलवाळ, मूळ कर्नाटक) अशें कामगाराचें नांव आसा.
ही दुर्घटणा 5 ऑक्टोबराक सकाळीं 6 वरांच्या सुमाराक मंदार गॅरेजींत घडली. दसरो आशिल्ल्यान गाडयो धुंवपाक परशुराम बेगीन कामाक आयिल्लो. गॅरेजींतल्या गाडयो धुवपाच्या वॉशींग रॅम्पाचेर तो चडलो. त्या वेळार उदकातल्यान ताका विजेचो शॉक लागलो आनी थंयच पडून ताका मरण आयलें.
मेळिल्ले म्हायती प्रमाण वीज कनेक्शनाची एक वायर जमनीचेर पडिल्ली. वीज प्रवाह सुरू करून तो रॅम्पाचेर आयलो तेन्ना ताका शॉक लागलो. ह्या वेळार गॅरेजीत तो एकलोच आशिल्लो.
सकाळीं 7 वरांच्या सुमाराक गॅरेजीचो धनी आयलो तेन्ना ताका परशुराम पडिल्लो दिसलो. ताकतिकेन तांणई 108 एम्ब्युलन्सीक आपयली आनी जिल्हो हॉस्पिटलांत उपचारा खातीर दाखल केलो. दोतोरांनी ताका आदींच मरण आयिल्ल्याचें जाहीर केलें. तशेंच परशुरामाक विजेचो शॉक बसून मरण आयिल्ल्याचेंय स्पश्ट केलें. घडणुकेची म्हायती मेळटाच म्हापशें पुलीस उपनिरिक्षक सुनील पाटील आनी हेर पुलिसांनी घडणुकेचे सुवातेचेर धांव मारली आनी पंचनामो केलो. उपरांत परशुरामाची कूड गोमॅकाँत पोस्टमार्टमा खातीर धाडली. ह्या प्रकरणांत पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
