भांगरभूंय | प्रतिनिधी
दिवचल: मयें तिखाजन हांगच्या गांवगिर्या वाठारांत कार्यरत आशिल्ल्या विजयानंद उच्च माध्यमीक विद्यालयाचो बारावेचो निकाल शंभर टक्के लागलो.
संस्थे वतीन ह्या वेळार कला फाट्यांतल्या मीनल दत्ता कंवठणकार (पयलें), संजीवनी संजीव नायक(दुसरें), कुणाल प्रमोद घाडी (तिसरो), जाल्यार वाणिज्य फाट्यांत स्नेहल गुरुदास कारबोटकार, मयुरी मनोहर केरकार, नितीशा विष्णू धारगळकार हांचो अध्यक्ष रुपेश ठाणेकार, उदय पत्रे आनी हेरां हस्तुकीं भोवमान जालो.
ह्या वेळार सागर ठाणेकार, रामनाथ चोडणकार, जितेंद्र पत्रे राया ठाणेकार, उमेश गडेकार, कृष्णा चोडणकार, प्राचार्य सिब्बल फर्नांडीस, सुधीर वालावलकार, सुमन गांवकार तशेंच पालक शिक्षक आनी हेर कामगार हाजीर आशिल्ले.
गांवगिर्या वाठारांतल्या भुरग्यां मदीं उत्कृश्ट प्रतिभा आशिल्ल्यान पालक शिक्षक वेवस्थापन आनी विद्यार्थी हांच्या यत्नांनी हे येस फावो जालां. उत्कृश्ट आनी दर्जेदार शिक्षण दिवपा खातीर संस्था सगळें सहकार्य करतली अशें अध्यक्ष रुपेश ठाणेकार हांणी सांगलें.
विद्यालयाच्या ह्या येसा खातीर सगळे कडल्यान तांची तोखणाय जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
