भांगरभूंय | प्रतिनिधी
वॅस्ट इंडिजान भारता आडचे तीन वन डे मॅचींचे माळे खातीर आपल्या 13 वांगड्यांच्या पंगडाची घोशणा केली. निकोलस पुरन पंगडाचें फुडारपण करतलो. जाल्यार उप मुखेल्याची जापसालदारकी शाई होपाक दिल्या. ह्या पंगडांत 2019चे इंडीयन प्रिमीयर लिगेंत 12 धांवड्यो दिवन 6 विकेटी घेवपी फास्ट बॉलर अल्जारी जोसेफाचो आस्पाव केला. तशेंच आदलो मुखेली जेसन होल्डराचें पुनरागमन जालां.
भारत आनी वॅस्ट इंडीज ह्या पंगडां मदीं 22, 24 आनी 27 जुलयाक वन डे मॅची जातल्यो. ह्यो सगल्योच मॅची पोर्ट ऑफ स्पेनांत जातल्यो. ते उपरांत पांच टी-20 मॅचींची माळ जातली.
भारतान पयलींच वॅस्ट इंडिजाचे भोंवडे खातीर आपलो वन डे आनी टी-20 पंगड वेंचला. रोहीत शर्मा, विराट कोहली, ऋषभ पंत आनी जसप्रीत बुमरा ह्या सिनीयर खेळगड्यांक विसव दिला.
वन डे पंगडाचो मुखेली शिखर धवन आसतलो, जाल्यार उप मुखेली रवींद्र जडेजा आसतलो.
वॅस्ट इंडीज पंगडः निकोलस पुरन (मुखेली), शाई होप (उप मुखेली), शमर ब्रुक्स, किसी कार्टी, जेसन होल्डर, अकील होसेन, अल्जारी जोसेफ, ब्रॅण्डन किंग, कायल मेयर्स, गुडकेश मोती, किमो पॉल, रोवमॅन पॉवेल, जेडन सिल्स.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
