भांगरभूंय | प्रतिनिधी
असुरक्षीत आशिल्ल्याचे रेल्वेचें म्हणणें; लोकांक मात त्रास
भांगरभूंय । प्रतिनिधी
मुरगांवः वास्को रेल्वे स्टेशना लागसारचो सगळ्यांत पोरणो उड्डाण पांयपूल भौशीक वापरा खातीर बिरेस्तार 12 जामेवारीच्यान बंद केला. रेल्वेन कसलीच सुचोवणी दिनासतना पूल बंद केल्ल्यान लोकां मदीं गोंदळ जाला. मात रेल्वेन तो पूल असुरक्षीत आशिल्ल्याचें दिशिल्ल्यान बंद केल्ल्याचें म्हणलां. रेल्वे पुलाचें काम रोखडेंच सुरू जातलें, अशी म्हायती वास्कोचे आमदार कृष्णा साळकार हांणी रेल्वे अधिकाऱ्यां कडेन चवकशी केले उपरांत दिली.
वास्को शारांतलो स्वातंत्र्य पथ मार्ग ते बायणांतल्या माता सेकंडरी स्कुलाक जोडपी रेल्वे उड्डाण पांयपूल रेल्वे स्टेशना लागसारूच आसा.य वास्कोच्या रेल्वे मार्गाचेर बायणाक जोडपी दोन उड्डाण पांयपूल आसात, जाल्यार एक मेस्तावाडो ड्रायव्हरहील वाठाराक जोडपी आसा. हे तिनूय पूल लोखणाचे आसात. ह्या तीन पुलां मदलो बायणांतलो माता सेकंडरी स्कुला मेरेन जोडपी पांयपूल सगळ्यांत पोरणो म्हणल्यार सुमार 50 वर्सां आदलो आसा. कांय खेपे ताची दुरुस्तीय केल्या. सध्या ह्या पुला वयल्यान दिसाक शेंकड्यांनी लोक यो- वच करतात. मजगतीं, बिरेस्तारा सकाळीं तो पूल लोकां खातीर उक्तो आशिल्लो, मात दनपारां तो बंद केलो. ताका लागून ह्या पांयपुलाचो वापर करपी लोकांची धांदळ जाली. खंयच्यान वच्चें तें कळना जावन ते गोंदळ्ळे. अखेर लोकांनी वास्को ते बायणा रस्त्याचो पर्याय वेंचलो. ताका लागून लोकांक आयओसी नाक्याचेर आशिल्ल्यान दुसऱ्या पांयपुला मेरेन चलत वच्चें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
