भांगरभूंय | प्रतिनिधी
वास्को: रेल्वे ट्रॅका वयल्यान चलत वचपी मनीश कुमार केवट (23) ह्या तरणाट्याक मंगळारा दनपारां रेल्वेचो धपको बशिल्ल्यान तो गंभीर जखमी जालो. ताका उपचारा खातीर गोंय वैजकी हॉस्पिटलांत दाखल केला. ह्या प्रकरणांत वास्को रेल्वे पुलीस स्टेशनाचे निरिक्षक अमरनाथ पासी हांणी पंचनामो केलाे.
मूळ मध्य प्रदेशाचो पूण कामा निमतान वास्कोंत रावपी मनीश हो दाबोळी विमानतळार हावसकिपिंगाचें काम करता.
तो मंगळारा दनपारां शांतीनगर सावन रेल्वे ट्रॅकान चलत दाबोळी विमानतळा कडेन वतालो. त्याच वेळार ताका रेल्वेचो धपको बशिल्ल्यान तो ट्रॅकाचे कुशीक पडलो. ताच्या दोनूय पांयांच्या खुब्याक जखमो जाल्यात. तो खूबसो वेळ वळवळत पडिल्लो.
हे विशींची कोणे तरी ताच्या इश्टांक म्हायती दितकूच ते थंय आयले. तांणी पुलीस आनी अॅम्बुलन्सीक म्हायती दिली. मजगतीं, 108 अॅम्बुलन्स थंय येवपाक कळाव जाल्ल्यान पुलिसांनी ताका हेरांचे मजतीन उबारून पुलीस वाहनांतल्यान चिखली हॉस्पिटलांत उपचारा खातीर व्हेलो.
थंय मुळावे उपचार केले उपरांत ताका गोंय वैजकी हॉस्पिटलांत धाडून दिलो. तो रेल्वे ट्रॅका वयल्यान चलत वतना घडये मोबायलाचेर उलयत वतालो आसुये. ताका लागून रेल्वेचो आवाज ताका आयकूंक येवंक नाशिल्ल्यान तो अपघातांत सांपडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
