भांगरभूंय | प्रतिनिधी
प्रा रामदास केळकार
—
जशी पोटाक भूक लागता तशी वाचन ही मनाची, बुद्धीची भूक थारोवपाक वाचन मजत करता. हें म्हजेंच मत आसा अशे ना तर कोणूय हें मान्य करतलोच. शाळेन तुमी वतात तेन्ना तुमका पुस्तकांची वळख जाता, पूण तीं पाठ्यपुस्तकां आसतात, तातून तुमकां पुस्तकांचो मात्सो परिचय जाता. तीं वाचून तुमी ह्या पुस्तकां भायलीं पुस्तकां वाचून भायल्या विश्वाची वळख करून घेवची ही अपेक्षा आसता. मागीर तुमका वाचनालया कडेन कोण तरी व्हरता आनी थंय तुमका विंगड विंगड भाशांचे लेखक, तांचे विश्व पळोवपाक मेळटा . ही सुरवातीची गजाल . मागीर तुमची जशी पिराय बदलत वता, तुमचो शिकपाचो फाटो तुमी घेता तशे त्या शाळेंतले, कॉलेजीचे प्राध्यापक तुमकां कांय लेखकांची पुस्तक सुचयतात. मागीर तुमची अशी आवड निर्माण जाता आनी ताका धरून तुमी वाचपाक सुरु करतात.
म्हाका याद जाता, आमच्या गांवान नवहिंद वाचनालय प्रागतिक विचारांच्या तरणाट्यांनी फुडाकार घेवन सुरु केल्लें. ताच्या पयली म्हजे वडील चांदोबा प्रत्येक म्हयन्याक हाडताले. ते वाचपाक आमचीं झगडीं चलतालीं. म्हाका शेवटाक वाचूंक मेळटालें. तातूंतल्या चित्रा वांगडा आसपी गजाली खूब आवडलेल्यो. त्या गजालींनी सांग सारकें खूब आशिल्लें. पूण फक्त वाचन करप इतले खातीर तें जातालें. मागीर साने गुरुजींचें श्यामची आई हातांत पडलें. आनी खरें सांगपाचें म्हळ्यार रडपाक शिकलों. डोळ्यान दुकां येवपाक लागलीं तीं पुस्तक सोंपय मेरेन. मात्सो व्हड जातकच वि स खांडेकर, ना सी फडके हांची वळख जाली, पूण तांच्याच वांगडा रहस्यकथा हातांत पडूंक लागल्यो. त्यो चोरया वाच्चो पडटाल्यो. गुरुनाथ नाईक, बाबुराव अर्नाळकर, दिवाकर नेमाडे, सुभाष शहा अशा जायत्या लेखकांचीं पुस्तकां वाचलीं. पूण वाचनाची देख लावपाचे काम ज्या लेखकांनी केले ते दुसरेच आशिल्ले. यदुनाथ थत्ते, दुर्गाबाई भागवत, रवींद्र पिंगे, विजय तेंडुलकर, इरावती कर्वे, शांता शेळके सारख्या लेखकांचे विश्व वेगळेंच आशिल्लें. संवसाराचो अणभव सांगप, एखादी घटना सांगप, इतिहासा कडे कशे पळोवप ही नजर ल्हवू ल्हवू येवपाक लागली. आनी मागीर एक दीस आपुणूच अशें बरोवंक शकतलो काय कितें, असो प्रश्न पडूंक लागलो.
एकादे आवयक तुजें खंयचें भुरगें आवडटा हाची जाप दिवप कठीण जाता, तशें म्हाका लेगीत खंयचें पुस्तक आवडटा, हें सांगप कठीण जाता. तरी पूण मागीर विंगड विंगड विषय येतात. जशे धार्मिक, आध्यात्मिक, सामाजिक, इतिहासिक, वैचारिक, सकारात्मक विचार दिवपी निबंध, चरित्र, आत्मचरित्र जशीं येतात, तशीं तुमकां कळपी भाशांतलीं पुस्तकां येतात. हाची सुरवात इंग्लेश दिसाळ्यान जावं येता, ना जाल्यार कॉमिक्स वाचून. ना जाल्यार रीडर्स डायजस्ट सारकें मासिक वाचून जावं येता. गोंयांतल्या तरनाट्याक मराठी, कोंकणी, इंग्लेश, हिंदी ह्या चार भाशांतलीं पुस्तकां वाचपाची संद मेळटा. आपल्याक वाचनान आवड निर्माण जाली कि आपलो विशय थारता आनी वाचन वाडत वता. पूण ही आवड कोणेतरी निर्माण करीत तर फुडाराक खूब लाव जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
