भांगरभूंय | प्रतिनिधी
तंजावर, खबरां संस्था ः तमिळनाडूंतल्या तंजावर जिल्ह्यांत एक देवूळ आसा, तें वर्सभर बंद आसता आनी फकत कार्तिक म्हयन्यांच्या निमण्या सोमारा उगडटा. हें देवूळ म्हणल्यार बोडू आवुदैयार देवूळ, जें खाशेली परंपरा आनी गूढ समजुतीं खातीर फामाद आसा.
वडाच्या झाडाची करतात पुजा
चड करून शिवदेवळांनी शिवलिंगाची पुजा करतात. पूण तमिळनाडूंतल्या बोडू अवुदैयार देवळांत शिव मुर्तीची वा शिवलिंगाच्या पुजा करचे बदला थंय आशिल्ल्या व्हडल्या वडाच्या झाडाची पुजा करतात. थंयचे लोक ह्या वटवृक्षाक शंकराचो अवतार मानून भक्तीन ताची पुजा करतात. पुजेच्या वेळार प्रसाद म्हूण वडाचीं पानां आनी पवित्र उदक अर्पण करतात.
देवळाच्या नांवा फाटल्यान एक काणी..
ह्या देवळाक बोडू अवुदैयार देवूळ हें नांव कशें मेळ्ळें हाचे फाटल्यान एक काणी आसा. आख्यायिके प्रमाण, दोन व्हड ऋषी-वनगोबर आनी महागोबर-खोलायेन ध्यानांत आशिल्ले आनी देवा मेरेन पावपाचो खंयचो मार्ग सगळ्यांत बरो हाचेर चर्चा करताले, घरगुती जिवीत वा त्याग? मागीर भगवान शंकर स्वता धव्या कापसाच्या झाडाखाला प्रगट जावन खऱ्या तत्वांक पाळो दिवपी मनीस कोणा परस श्रेश्ठ वा उण्या दर्ज्याचो ना असो संदेश ऋषींक दिलो. ह्या कारणाक लागून ह्या देवळाच्या देवतेक ‘पोट्टू अवुदैयार’ आनी ‘मथ्यपुरीश्वर’ अशेंय म्हण्टात.
दर वर्सा कार्तिक म्हयन्याच्या निमाण्या सोमारा हजारांनी भक्त शिवशंकराचे दर्शन करपाक आनी शिवाक वेगवेगळीं वस्तू अर्पण करपाक हांगा येतात. भक्त भांगर, रुपें, पितळे, पयशे, तशेंच तांदूळ, दाळ, उडीद, मसूर, तिळ, नाल्ल, आंबो, चीच, मिरसांग, भाजी प्रसाद म्हणून अर्पण करतात. तेच बरोबर शंकराक प्रसन्न करपा खातीर कांय लोक बकरी आनी कोंबडी प्रसाद म्हणून अर्पण करतात. अशे तरेन शिवाचो आशीर्वाद तांच्या सगळ्या भक्तांचेर आसता आनी तांचीं सगळीं इत्सा पुराय जातात अशें तांचें मत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
