भांगरभूंय | प्रतिनिधी
श्रीलंके आडची टी-20 माळ 2-1 अशा फरकान जिखल्या उपरांत आतां वन डे माळेक सुरवात जातली. पयली मॅच आयज गुवाहाटींतल्या एसीए मैदानाचेर जातली.
ऑक्टोबर-नोव्हेंबर म्हयन्यांत भारतांत संवसारीक वन डे क्रिकेट सर्त जावपाची आसा. ताका लागून तयारेचे दिश्टीन हे माळेक म्हत्व आसा. पूण, माळ सुरू जावचे पयलींच भारताक खर धपको बसला. फास्ट बॉलर जसप्रीत बुमराक दुखापतीक लागून माळ चुकतली. पोरूं सप्टेंबरांत फाटीचे दुखापतीक लागून ताका मैदाना भायर रावचें पडिल्लें. ताका पोरूं जाल्ली संवसारीक टी-20 सर्त लेगीत चुकिल्ली. श्रीलंके आडचे माळे वरवीं तो पुनरागमन करपाक सज्ज आशिल्लो. पूण, ताका आतां पुनरागमन करपाक आनीक कांय दीस वाट पळोवची पडटली.
सदचो मुखेली रोहित शर्मा पंगडाचें फुडारपण करपाक सज्ज आसा. डिसेंबरांत बांगलादेशा आडचे वन डे मॅचींत ताच्या आखाण्याक दुखापत जाल्ली. ताचे खेरीत विराट कोहली, श्रेयस अय्यर आनी लोकेश राहुल खेळपाक तयार आसात.
रोहित शर्मा डावाची सुरवात करतलो, जाल्यार विराट कोहली तिसरे सुवातेर येतलो. अय्यर, शुभमन गिल आनी इशान किशन हांकां खंयचे सुवातेर खेळतले हें पळोवपा सारकें आसा. इशानान बांगलादेशा आडचे मॅचींत कारकिर्दींतली सर्वोच्च 210ची खेळी केल्ली. जाल्यार पोरूं गिलान आपल्या रुपान वन डे मॅचींत आपूण लेगीत पर्याय आसा हें दाखोवन दिलां.
पोरूं वन डे क्रिकेटींत मदले फळयेंतलो भारताचो म्हत्वाचो खेळगडो आशिल्लो. ताचे खेरीत सुर्यकुमार यादव लेगीत पंगडांत आसा. टी-20तल्या प्रदर्शनाच्या नेटार वन डे पंगडांतली लेगीत सुवात घटमूट करपाक इत्सूक आसा.
अणभवी फास्ट बॉलर मोहम्मद शमीचें पुनरागमन भारता खातीर बरी गजाल आसा. तो मोहम्मद सिराज आनी अर्शदीप सिंग हांच्या वांगडा जोडी करपाक शकता. स्पीन विभागांत वॉशिंग्टन सुंदर आनी युजवेंद्र चहल कशें प्रदर्शन करतले हाचेर लेगीत क्रिकेट मोग्यांची नदर आसतली. हाचे खेरीत अश्टतासांचो खेळगडो हार्दिक पांड्या कडल्यान मदल्यो ओव्हरी करून घेवपाक शकता.
दुसरे वटेन श्रीलंकेचो पंगड मुखेली दासून शनाका हांचेर चड निंबून आसा. ताचे खेरीत युवा बॅट्समन पथुम निसंका, अविष्का फर्नांडो, चरिथ असलंका आनी कुशल मॅण्डीस हांच्या कडल्यान पंगडाक बऱ्या खेळाची आस्त आसा.
लेग स्पीनर जॅफ्री वाडंरसे, वानिंदू हसरंगा आनी महेश थीक्षाणा हे स्पीन विभाग सांबाटले. फास्ट बॉलींग विभागांत लाहिरु कुमारा, कसुन राजिथा आनी प्रमोद मदुशन आसा. तशेंच दिलशान मदुशंका पंगडा कडेन दाव्या हातान बॉलींग घालपी बॉलराचो पर्याय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
