भांगरभूंय | प्रतिनिधी
पणजी: फलोत्पादन म्हामंडळा कडल्यान लोकांक ताजी भाजी मेळची हे खातीर सगल्या पुरवणदारांक आदेश दिल्यात. पेड्डेर भाजी पुरोवपी पुरवणदारांची भाजयेची पुरवण बंद करतले. लोकांक बऱ्या दर्जाची भाजी मेळची हे खातीर फलोत्पादन म्हामंडळ खूबशो सुदारणा करीत आसा अशी म्हायती फलोत्पादन म्हामंडळाचे अध्यक्ष प्रेमेंद्र शेट हांणी दिली.
फलोत्पादन म्हामंडळांत व्हड प्रमाणांत सुदारणा जाल्या. दीसपट्टें म्हामंडळा वतीन 120 टन भाजी आयात करता. दरेक दुकानार ताजे भाजयेची पुरवण जाता. भाजयेजी तपासणी करून भाजी खरेदी करतात. बरी भाजी गिरायकांक मेळची हे खातीर म्हामंडळाचे अधिकारी सगले ते यत्न करतात. ताका लागून बऱ्या दर्जाचे भाजयेची पुरवण लोकां मेरेन जायत आसा. आतां श्रावण म्हयनो सुरू आशिल्ल्यान भाजयेजी मागणी वाडल्या. ताका लागून लोकांक भाजयेचो उणाव जावचो न्हय हे खातीर लोकांचे मागणे प्रमाण पुरवण करतात. तेच प्रमाण भाजयेची आयातूय करतात अशें प्रेमेंद्र शेट हांणी सांगलें.
फलोत्पादन म्हामंडळाक थळाव्यांची भाजयेची पुरवण दिसाक फक्त 1 टन जाता. ताका लागून व्हड प्रमाणांत भाजी आयात करची पडटा. गोंयांत भाजयेक खूब मागणी आसा. तशेंच हॉटेलांनी भाजये खातीर व्हड प्रमाणांत मागणी आसता. ताका लागून बेळगांव सावन व्हड प्रमाणांत भाजी आयात करची पडटा. थळाव्यांच्या भाजयेचो उणाव जाणवत आसा. थळाव्यांचे भाजयेक फलोत्पादन म्हामंडळ पयलें प्राधान्य दिता अशें प्रेमेंद्र शेट हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
