भांगरभूंय | प्रतिनिधी
चंद्रकांत कवळेंकारः टीबी दुयेतींक घेतले पोसके
भांगरभूंय । प्रतिनिधी
केपें: लोक सेवा करचे खातीर वेंचून येवपाक जाय अशें ना. काम करपाची इत्सा आसल्यार वेंचून येनासतना लेगीत काम करपाक जाता, अशें आदले उपमुख्यमंत्री चंद्रकांत कवळेंकार हांणी सांगलें. बाळ्ळी भलायकी केंद्रांत टीबी दुयेतींक दत्तक घेवपाचे कार्यावळींत ते उलयताले.
बाळ्ळी भलायकी केंद्रांतल्या 15 टीबी दुयेतींक कवळेंकार आनी कुंकळ्ळीचे आदले आमदार क्लाफास डायस हांणी पोसके घेतल्यात. तांकां पुश्टीक आहार दिवपाची पुराय जापसालदारकी दोगांनीय घेतल्या. बाळ्ळी भलायकी केंद्राची अधिकारी डॉ. ममता काकोडकार हांचे कडेन पुश्टीक आहार दिलो. सेवा पंद्रशी खाला बाळ्ळी भलायकी केंद्रांत आयोजीत केल्ले हे कार्यावळीक दक्षीण गोंय जिल्हो पंचायत उपाध्यक्ष खुशाली वेळीप, गिरदोळी जिल्हो पंचायत वांगडी संजना वेळीप, फातर्पाचे सरपंच महेश फळदेसाय, गोंय प्रदेश भाजपा अनुसूचीत जमातीचे मोर्चो अध्यक्ष प्रभाकर गांवकार, गोंय प्रदेश भाजपा महिला मोर्चो म्हासचीव जोर्जिना गामा, केपें मंडळ अध्यक्ष संजय वेळीप, कुंकळ्ळी मंडळ अध्यक्ष मारुती देसाय, केपें महिला मोर्चो अध्यक्ष शितल नायक, बाळ्ळीची पंच नविता फळदेसाय आनी अंजू वेळीप, फातर्पेची पंच अगीमा रेबेलो आनी केपें तशेंच कुंकळ्ळी मतदारसंघांतले मुखेल भाजपा कार्यकर्ते हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
