लोकसंख्येचे तुळेंत सत्तरींत सगळ्यांत चड सरकारी कर्मचारी

भांगरभूंय | प्रतिनिधी

मुरगांवां सरकारी कर्मचार्‍यांचो आंकडो सगळ्यांत उणो

पणजी : राज्यांत 63 हजार 162 सरकारी कर्मचारी सेवा दितात. हातूंत सगळ्यांत चड सरकारी कर्मचार्‍यांचो आंकडो बार्देस म्हालांत आसा. पूण, लोकसंख्येचे तुळेंच सगळ्यांत चड सरकारी कर्मचारी सत्तरी म्हालांतले आसात. बार्देसची लोकसंख्या 2 लाख 37 हजार 440 आशिल्ल्यान तांतले 9 हजार 738 म्हळ्यार लोकसंख्येच्या 4 टक्के लोक सरकारी कर्मचारी आसात. जाल्यार, सत्तरीची लोकसंख्या 63 हजार 817 आसा. तांतले 4 हजार 466 नागरीक सरकारी कर्मचारी आसा. हो आंकडो लोकसंख्ये प्रमाण 7 टक्के आसा.

सरकारी नोकरी मेळचे खातीर सगळेच धडपड करतात. ताका लागून राज्यांतले हजारांनी उच्चशिक्षीत तरणाटे लेगीत एमटीएस, कारकून, हवालदार अशा पदां खातीर अर्ज करतात. सरकारी कार्यालयां भायर बर्‍योच व्हड रांको करतात. सगळ्यांत चड कर्मचार्‍यांची भरती सत्तरींतल्यान जाल्ल्याची चर्चा सदांच सुरू आसता. पूण सेवा दिवपी सरकारी कर्मचार्‍यांची म्हालां प्रमाण आकडेवारी पळयल्यार सत्तरी, पेडणें, दिवचल आनी केपें ह्या म्हालांनी सरकारी कर्मचारी म्हणून सेवेंत आशिल्ल्यांचो आंकडो चड आसा. 

सरकारी खातीं, महामंडळां, सरकारी अनुदानाचेर चलपी संस्था, स्वायत्त संस्था अश्या विवीध विभागांनी कर्मचार्‍यांचो आंकडो 63 हजार 162 आसा. हें सरकारान केल्ल्या सरकारी कर्मचार्‍यांच्या सर्वेक्षण अहवालांतल्यान स्पश्ट जालां. आधारकार्डाचो आधार घेवन तयार केल्ले लोकसंख्येचे तुळेन दरेका 25 गोंयकारांच्या फाटल्यान एक सरकारी कर्मचारी कार्यरत आसा. लोकसंख्ये कडेन तुळा केल्यार सरकारी कर्मचार्‍यांमदीं सगळ्यांत चड टक्केवारी सत्तरी, पेडणें, दिवचल आनी केपें ह्या म्हालांनी आसा. 

बार्देस म्हालांत 9 हजार 738 सरकारी कर्मचारी आसा. नवोच तयार जाल्ल्या धारबांदोडें म्हालांत 939 सरकारी कर्मचारी आसात. हो म्हाल 2011 च्या जणगणने वेळार नाशिल्लो. साश्टीची लोकसंख्या 2 लाख 94 हजार 464 आसा. पूण, ते तुळेंत थंय 3 टक्केच सरकारी कर्मचारी आसात. मुरगांव आनी सांगें म्हालांत लोकसंख्येचे तुळेंत सगळ्यांत उणे सरकारी कर्मचारी म्हणून सेवेंत आसात. मुरगांवची लोकसंख्या 1 लाख 54 हजार 561 आसा. तांतले 2.30 टक्के लोक सरकारी कर्मचारी आसा. सांगेंची लोकसंख्या 65 हजार 147 आसा. तांतले 2.61 टक्के लोक सरकारी कर्मचारी म्हणून कार्यरत आसात.