भांगरभूंय | प्रतिनिधी
प्रधानमंत्री नरेंद्र मोदी हांचे हस्तुकीं जातलें उक्तावण
भांगरभूंय । प्रतिनिधी
पणजी : मोपा विमानतळाचेर अवजड उद्देगां खातीरच्या लॉजिस्टीक उद्देगीक प्रकल्पाचें डिसेंबरांत प्रधानमंत्री नरेंद्र मोदी हांचें हस्तुकीं उक्तावण जातलें अशें मुख्यमंत्री डॉ. प्रमोद सावंत हांणी जाहीर केलां. फोरेन्सीक विद्यापीठ, संवसारीक कायदो विद्यापिठा उपरांत गोंयांत डिझायन विद्यापीठ स्थापन जातलें अशेंय तांणी सांगलें. इन्वेस्ट गोवा परिशदेच्या एकाच दिसा 15 हजार नोकऱ्यो तयार जावपी गुंतवणुके विशीं कबलाती जाल्याे.
मुख्यमंत्री डॉ. प्रमोद सावंत हस्तुकीं इन्वेस्ट गोवा 2022 परिशदेचें उक्तावण जालें. ताळगांव कम्युनिटी सेंटरांत जाल्ले कार्यावळीक आदले केंद्रीय मंत्री सुरेश प्रभू, उद्देग मंत्री मॉवीन गुदिन्हो, म्हायती तंत्रज्ञान खात्याचे मंत्री रोहन खंवटे, गोवा चेंबरचे अध्यक्ष राल्फ डिसोझा, मांगिरीश पै रायकार आनी हेर मानेस्त हाजीर आशिल्ले. महाराष्ट्र, गुजरात, बेळगांव हांगाच्या कॉमर्स चेंबरांचे अध्यक्ष परिशदेक हाजीर आशिल्ले.
शिक्षण, पर्यटन, शेती, उद्देग, हॉस्पिटेलिटी ह्या वाठारांनी राज्यांत मुळाव्याे सुविधा तयार जायत आसात. मुळाव्या सुविधांक लागून राज्यात गुंवणूक करपाक वाव आसा. आयटी, शेती, पर्यटन, शिक्षणीक गुंतवणुकीक राज्यांत पुरक वातावरण आसा. इन्वेस्ट गोवा परिशदेंत एकाच दिसा 5 हजार कोटींची गुंतवणुकीचे प्रस्ताव आयल्यात. हातूंतल्यान 15 हजार नोकऱ्यो तयार जातल्यो.
डिझायन विद्यापीठ स्थापन जातलें
हालींच गोंयांत राष्ट्रीय फोरेन्सीक विज्ञान विद्यापीठ स्थापन जालां. ते भायर संवसारीक कायदो विद्यापीठ स्थापन जालां. आतां डिझायन विद्यापीठ स्थापन जातलें. राज्यांत बिट्स पिलानी, आयआयटी, एनआयटी अश्यो नामनेच्यो संस्था आसात. शेती म्हाविद्यालय स्थापन जालां. हॉस्पिटेलिटी, पर्यटन, आयटी वाठारांत नवे अभ्यासक्रम सुरू जाल्यात. हाका लागून गोंयांत कुशळ मनीसबळ तयार जाता. आयटी, पर्यटन, शेती, फार्मास्युटीकल ह्या वाठारांनी फुडाराक गोंयांत मनीसबळाचो उणाव जावचो ना.
गुंतवणुके खातीर गोंय सर्वोत्तम
दाबोळी विमानतळाक लागून विमान सेवा आसा. मुरगाव बंदराक लागून बोट सेवा आसा. रेल्वे सेवा आसा. आतां मोपा विमानतळ जाता. मोपा विमानतळाक लागून संवसारीक तशेंच देशी येरादारी सोंपी जातली. देशांत नामनेचें लॉजिस्टीक हब गोंयांत जाता. हाका लागून अवजड उद्देगांचे सामान, शेतीचो म्हाल तशेंच वाहनां पार्क करपाची वेवस्था जातली. गोंय हें सोबीत आसा. गुंतवणुकी खातीर गोंय हे सर्वोत्तम राज्य आसा, अशें मुख्यमंत्री डॉ. प्रमोद सावंत हांणी सांगलें.
वेवसाय सुलभता, एक जनेल पद्दत गोंयांत सुरू जाल्या. गुंतवणुकीक चालना दिवपा खातीर गुंतवणूक म्हामंडळ अस्तित्वांत आसा.
वेर्ण्यां मनी क्लस्टर जातलें. तुयां इलेक्ट्रॉनीक मॅनुफॅक्चरींग क्लस्टर जातलें. इलेक्ट्रॉनीक क्लस्टरा खातीर आरएफक्यू जारी जाला.
जी 20 तशेंच आयुर्वेद परिशद जातली
गोंयांत संवसारीक पांवड्या वेल्यो कार्यावळी जातात. येता त्या काय दिसांनी जी 20 परिशद जातली. ते भायर संवसारीक आयुर्वेद परिशद लेगीत गोंयांत जातली. गोंय हे नामनेचे इव्हेंट डेस्टिनेशन जालां. 2004 सावन सेगीत गोंयांत चित्रपट महोत्सव जाता. चित्रपट महोत्सवाक लागून मनरिजवण उद्देगाक वाव आसा. सोबितकायेक लागून बऱ्याच चित्रपटांचे शुटींग गोंयांत जाता.
गोंयची वाटचाल योग्य दिकेन सुरू आसा. आत्मनिर्भर भारताचे प्रधानमंत्री नरेंद्र मोदी हांचें सपन आसा. हें सपन पुराय करपा खातीर गोंयान स्वयंपूर्ण गोंय मोहीम सुरू केल्या. आदले केंद्रीय मंत्री सुरेश प्रभू हांणी गोंयाक बरेंच सहकार्य केलां. उद्देगीक उदरगती खातीर तांचे कडल्यान आनीक सहकार्याची आस्त आसा, अशें मुख्यमंत्र्यांनी सांगलें.
हॉटेल नोंदणी : एनओसीचो आंकडो 15 वेल्यान 3 चेर
हॉटेल नोंदणी खातीर पयली 15 हरकत ना दाखले घेवचे पडटाले. आतां हरकत ना दाखल्यांचो आंकडो 15 वेल्यान 3 चेर आयला. आतां नोंदणी खातीर 3 हरकत ना दाखले घेवचे पडटात. तशेंच प्रदुशण नियंत्रण मंडळा कडल्यान आतां हरकत ना दाखलो घेवचो पडना. स्वेच्छेन घोशणापत्र दिवप पुराय थारता अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
