भांगरभूंय | प्रतिनिधी
सकाळ जाली आनी सुर्याचीं किरणां लुटूच्या जनेलार पडलीं. खाटीर न्हिदला थंय ताका लख्ख उजवाड दिसलो. दोळे चोळीत तो उठून रांदचे कुडींत ताचे मांक सोदूंक गेलो.
लुटूची मां नाश्तो तयार करताली. इतल्यांत लुटून येवन तिका घट्ट धरली. मांन ताका मायेन हांडीर धरलो. ताची अपुरबाय केली आनी रोखडेंच तिणें ताचे तोंड धुयलें आनी ताका ताच्या कदेलार हाडून बसयलो. दुदा बराबर तो बटर पाव खातालो, म्हुणून तिणें ताका तो तयार केल्लो. तिणें नाश्तो ताच्या मुखार दवरलो आनी तो थंड बसून खावंक लागलो. इतल्यांत कां कां करीत कावळो जनेलाच्या आदुफार येवन बसलो.
कावळो सदांच लुटू दूद घेतना कां कां करीत आदुफार बसून रावतालो. मांन सदांचे भशेन लुटूच्या मुखार दुसरे बशेंत कावळ्याक दिवंक पावाचे कुडके घालून दवरले. लुटून आपलें खावप सोंपयलें आनी तो कावळ्याक पावाचे कुडके घालपाक बशी घेवन फांटल्यातल्यान सोंपणाचेर रावलो.
कावळो सामको हुतहुतेपणान कां कां करीत निमण्या सोंपणार येवन उबो रावलो. लुटून कावळ्याक सगळे पावाचे कुडके घाले आनी म्हणलें, “आतां कां कां करी नासतना खा आनी मागीर तुज्या ताळ्याक लागत म्हूण हांगां सकयल तुका प्लेटींत उदक दवरतां तें तूं पी. मागीर तूं उडत वच तुज्या कामाक. परत फाल्यां यो आं?”
असो लुटू कावळ्या कडेन आपलो इश्ट जाल्ल्यावरी उलयतालो आन कावळो तो सांगता तशें करतालो. दोगांचेय खावन जालें. कावळो कां कां करीत उडून गेलो आनी लुटू मां म्हऱ्यांत आयलो. मांन ताका इल्लें काम दिलें. सकाळीं फुडें ताच्या पापान थोड्यो फळ-भाज्ज्यो हाडिल्ल्यो. त्यो सगळ्यो सुपान दवरिल्ल्यो. तातंलें थोडे गाजर एका तोपांत, दुसऱ्या तोपांत थोडे भेंडे, तिसऱ्या तोपांत डब्बू मिरसांगो आनी चवथ्या तोपांत तोमांटा घालपाक सांगलें.
लुटू आपल्या इल्ल्याश्या हातानीं ल्हव ल्हव हें काम करीत रावलो. एके वटेन मां आपली कामां करता आनी दुसरे वटेन लुटू आपलीं कामां करता. ताका आपुणूय कामांत आसा म्हूण खूब बरें दिसतालें. ताची मां ताणें मस्ती करची न्हय म्हूण ताका अशीं कामां दिताली. पूण लुटू हें काम मजेंन करतालो. तिकाय तें पळोवन बरें दिसतालें. तितलें करतकच ती ताका न्हाणयताली. ताचें न्हावन जातकच ती न्हावंक वताली.
एक दीस ती न्हावंक गेल्ले कडेन तिचे बालदेंत तिणें एक धाकटो बेबो पळयलो. तेन्ना आवयस्स म्हणलें. तें आयकून लुटू भियेलो. मांक कितें जालें काय म्हूण तो धांवत मां म्हऱ्यांत आयलो. कितें जालें मां म्हणून रडूंक लागलो. मांन ताका म्हऱ्यांत ओडलो आनी बालदेंतलो बेबो दाखयलो. बेबो साप्पच धाकटो आशिल्ल्यान ताका त्या उदकांतल्यान भायर येवंक कळना जालें. रोखडीच तिका एक युक्ती सुचली.
लुटूंक तिणें मात्सो कुशींक उबो दवरलो आनी ल्हव ल्हव तिणें बालदी आडवी केली. बालदी आडवी जातकच उदक सकयल पडूंक लागलें. आनी बेबो ल्हव-ल्हव चलूंक लागलो. आनी फट करून ताणे सकयल उडी मारली. लुटून हें पळेंलें आनी तो खोशयेन नाचूंक लागलो.
मागीर मां न्हावन येतकच तिणें देवाची पुजा केली. तिचे बराबर लुटून ताळ घेवन आरतीय म्हणल्यो. आनी मां कडल्यान निवेद्या घेवन खातकच तो थोडो वेळ टिवीचेर कार्टून पळोवंक लागलो. तितल्यांत दनपार जाली आनी मांन ताका वाडलो आनी तीय ताचे बराबर जेवली. सांजचो थोडो वेळ तो मा बराबर न्हिदलो आनी रातचो पापा बराबर पेज जेवन आज्जे कुडींत वचून बसलो. आज्जेन ताका सोंशाची आनी कासवाची काणी सांगली. ती आयकून तो सुस्त न्हिदलो.
अशे तरेन सदांच तो कसल्योय कटकटी नासतना बरे तरेन रावतालो. एक दीस सकाळी तों दूद घेता आसतना कावळो आयलो ना म्हूण ताका चुकिल्ल्या भशेन दिसलें. मां हॉलांत बसून लुटूच्या कपड्यांची घडी करताली तेन्ना लुटू थोडो पाव मेजारूच दवरून कावळ्याक पळोवंक भायर गेलोय कां कां करतल्या कावळ्याचो आवाज ताच्या कानार पडलो. पूण कावळो ताका दिसनाशिल्लो. तो घरा फाटल्यान उदकाचें रिकामें बल्ल आशिल्लें थंय गेलो. ताका कावळ्याचो आवाड त्या बल्लांतल्यान आयलो. बल्ल व्हडलें आशिल्लें. ताका कावळो दिसनाशिल्लो. सांगपाचें म्हणल्यार बल्ला वयर जाळी आलायती धांपिल्ली आशिल्ली ती, कावळो थंय उबो राविल्ल्यान जाळी उलटी जाली आनी कावलो बल्लांत भितर पडलो. वयर आशिल्ली जाळी तो काडूंक शकनाशिल्लो म्हूण तो मोठ्यान कां कां करतालो. ताका कशेय तरेन, भायर काडूंक जाय आशिल्लो. लुटूक मांची युक्ती याद जाली.
लुटून रिकामें बल्ल व्हडलो नेट करून कशेय तरेन आडवें केलें. ताका खूब पुरो जालें. पूण फुडलें अजाप पळोवन तो उमेदीन भरलो. कावळो ल्हव-ल्हव, कां कां करीत लुटू म्हऱ्यांत आयलो. लुटून ताका बेग-बेगीन पावाचे कुडके हाडून दिले आनी प्लॅटीन उदक घालें. कावळ्याचें पाव खावन आनी लुटून पियेवन पोट भरलें. कावळो खोशयेन कां कां करीत लुटूक पळेत उडून गेलो. बल्लाचो आवाज आयकून मां जनेला कडेन आयली आनी तिणे थंयच्यान शांत रावून लुटून केल्ली करामत पळेली. आनी त्या करामतींतल्यान लुटून कावळ्याक वांचयलो म्हूण तिका खूबच अजाप दिसलें. आनी लुटूची व्हडवीकूय दिसली. ती ताच्या म्हऱ्यांत गेली आनी तिणे लुटूचे फाटीर हात ओडलो, मायेन ताका म्हऱ्यांत घेतलो आनी ताका शाबासकीय दिली. लुटू खोशी जालो.
रेखा रामनाथ नायक
9822587823
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
