भांगरभूंय | प्रतिनिधी
लखनौ सुपर जायण्ट्सान इंडीयन प्रिमीयर लिगेचे (आयपीएल) प्ले ऑफांत सुवात मेळयली. ताणें कोलकाता नायट रायडर्साक 2 धांवड्यांनी हारयलो. ह्या जैता उपरांत लखनौ सुपर जायण्ट्स गुणतकट्यांत दुसरे सुवातेर आयलो. जाल्यार दुसरे वटेन कोलकाता नायट रायडर्साचें आव्हान सोंपलें. ताचे 14 मॅचींतल्यान 12 गूण आसात.
लखनौन दिल्ले 210 धांवड्यांचे मोखीचो फाटलाव करतना कोलकातान 8 विकेटी वगडावन 208 धांवड्यो केल्यो. एका वेळार कोलकाता ही मॅच सहज हारता अशें दिशिल्लें. पूण, रिंकू सिंगान 15 बॉलांनी 40 धांवड्यांची खेळी करून मॅच उमळशीक वाडोवपी स्थितींत हाडली. पंगडाक निमाण्या दोन बॉलांनी तीन धांवड्यांची गरज आशिल्ली. त्या वेळार स्टोयनीसाच्या बॉलाचेर एवीन लुईसान रिंकूची जबरदस्त कॅच धरली. ते उपरांत स्टेयनीसान उमेश यादवाक बाद करून लखनौचें जैत निश्चीत केलें. ते पयलीं मुखेली श्रेयश अय्यरान 50 धांवड्यांची खेळी केली. नितीश राणान 42 आनी सॅम बिलिंग्सान 36 धांवड्यांची खेळी केली. लखनौ वतीन मोहसीन खानान सगल्यांत चड तीन विकेटी घेतल्यो.
ते आदीं लोकेश राहुलान टॉस जिखून पयली बॅटींग करपाचो निर्णय घेतलो. ताणें आनी क्विंटन डी कॉकान हो निर्णय योग्य थारायलो. दोगांयनी 20 ओव्हरी खेळून 210 धांवड्यांचो दोंगर उबारलो. क्विंटन डी कॉकान नाबाद 140 धांवड्यांची खेळी केली जाल्यार राहुलान नाबाद 68 धांवड्यांचें योगदान दिलें.
डी कॉकाचो आयपीएलांतल्या इतिहासांतलो हो दुसरो शेंकडो थारलो. ताणें आपलो पयलो शेंकडो 2016त रॉयल चॅलेंजर्स बंगळुरू आड मारिल्लो. मजगतीं, अंदूंच्या हंगामांत वैयक्तीक सर्वोत्कृश्ठ धांवड्यो करपाचो रिकॉर्ड लेगीत आपल्या नांवार केलो. ताणें जोस बटलराक फाटीं घालो. बटलरान दिल्ली कॅपिटल्सा आड 116 धांवड्यांची खेळी केल्ली.
तशेंच अंदूंच्या हंगामांत शेंकडो मारपी तो तिसरो बॅट्समन थारलो. ताणें आपलो शेंकडो फक्त 59 बॉलांनी पुर्ण केलो.
मजगतीं, राहुलान अंदूंच्या हंगामांत 500 धांवड्यांचो आंकडो हुपलो. तशेंच आयपीएलाच्या इतिहासांत पयले विकेटी खातीर सर्वोच्च भागिदारीचो विक्रम लेगीत हे जोडयेन केलो.
कोलकाता नायट रायडर्सान आपल्या पंगडात एक बदल केलो. ताणें जखमी अजिंक्य रहाणेचे सुवातेर अभिजीत तोमराक संद दिली, जाल्यार लखनौ सुपर जायण्ट्सान तीन बदल केले. दुखापतीक लागून कृणाल पांड्या पंगडांतल्यान भायर आसा, जाल्यार पंगड वेवस्थापनान चमीरा आनी आयुष बदोनी हांकां पंगडांतल्यान वगळायले. तांचे सुवातेर मनन व्होरा, एल्वीस लुईस आनी कृष्णाप्पा गौतम हांकां खेळयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
