लखनौन दिल्लीक सेगीत दुसरे फावट दिलो हारीचो धपको

भांगरभूंय | प्रतिनिधी

खबरां संस्था
पुणेः आयपीएलाचे आयतारा जाल्ले मॅचींत लखनौ सुपर जायट्सान दिल्ली कॅपिटल्साक परत एक फावट हारीचो धपको दिलो. ही मॅच तांणी 6 धांवड्यांनी जिखली. दिल्लीन लखनौ कडल्यान दुसरी हार घेतली. ह्या जैतान केएल राहुलाच्या फुडारपणा  खाला लखनौन प्ले ऑफचे दिकेन आनी एक पेजाद पावल घातलां. 10 मॅचींत तांणी 7 जैतान ताचें 14 गुण जाल्यात. गुण क्रमवारींत ते दुसरे सुवातेर पावल्यात.
जैता खातीर 196 धांवड्यांचें लक्ष्य घेवन मैदानांत देंवल्ल्या दिल्लीची सुरवात सामकी बाबत जाली. दुसऱे ओव्हरींत ओपनर पृथ्वी शॉ फकत 5 धांवड्याचेर आवट जालो. जाल्यार  तिसरे ओव्हरींत डेव्हीड बॉर्नर लेगीत 3 धांवडो करून परत आयलो. दोनूय ओपनर आवट जाले तेन्ना दिल्लीची अवस्था 2 बाद 13 अशी आशिल्ली. ह्या दोगांयचे सुवातेर आयिल्ल्या मिचेल मार्श आनी कॅप्टन ऋषभ पंत  हांणी तिसरे विकेटी खातीर अर्द शेंकड्याची भागिदारी  केली. ही जोडी जमल्या अशें दिसतनाच मार्श आवट जालो. ताणे 20 बॉलांत 3 सके आनी 3 चौक्यांनी 37 धांवड्यो केल्यो. मार्श उपरांत आयिल्ल्या लतित यादवाक रवी बिश्नोईन 3 धांवड्यांत परत धाडले.
एका फाटल्यान एक विकेटी पडत आसतना कृषभात लखनौच्या बॉलरांक धुवून काडलें. पंगडाचो शेंकडो जाल्या उपरांत मोहसीन खानान ताका आवट केलें. ऋषभान 30 बॉलांत 44 धांवड्यो केल्यो. तो आवट जातकूच रोवमॅन पॉवेल आनी अक्षर पटेल हांचे कडल्यान दिल्लीक व्हड आस्त आशिल्ली. तांणी आक्रमक बॅटींग केली पूण 17वे ओव्हरींत पॉवेल बाद जालो आनी दिल्लीची आस्त सोंपली, तळाकडल्या बॅट्समनांक जैता खातीर नेटान धांवड्यो करप जमलें ना आनी 20 ओव्हरींत तांणी 7 बाद 189 धांवड्यो केल्यो आनी 6 धांवड्यांनी तांची हार जाली.
ताचे पयलीं लखनौन टॉस जिखून पयलीं बॅटींग करपाचो निर्णय घेतलो. कॅप्टन केएल राहुल आनी क्विंटन डी कॉक हांणी पंगडाक बरी सुरवात करून दिली. 42 धांवड्यांचेर शार्दुल ठाकूरान डी कॉकाक आवट केलें. ताणे 23 धांवड्यो केल्यो. ते उपरांत आयिल्ल्या दीपक हुडान राहुला वांगडा 95 धांवड्यांची भागिदारी केली. दीपकान 34 बॉलांत 1 सको आनी 6 चौक्यांनी 52 धांवड्यो केल्यो. ताकाय शार्दुलान आवट केलें. दुसरे वटेन कॅप्टन राहुलान लेगीत अर्द शेंकडो पुराय केलो. 19वे ओव्हरींत शार्दुलान राहुलाक आवट केलें. ताणे 51 बॉलांत 5 सके आनी 4 चौक्यांनी 77 धांवड्यो केल्यो. निमणे ओव्हरींत मार्कस स्टोइनीस आनी कुणाल पंड्या हांणी दरेकी 17 आनी 9 धांवड्यांचें योगदान दिले. ताका लागून लखनौन 3 बाद अशी 195 अशी दमदार धांवसंख्या उबारली. दिल्ली 6 बॉलरांक वापरून पळयलें. मात शार्दुल ठाकूर सोडून कोणाक विकेट घेवप शक्य जालें ना. शार्दुलान 4 ओव्हरींत 40 धांवड्यो दिवन 3 विकेटी घेतल्यो.
केएल राहुलाचो विक्रम
राहुलान दिल्ली कॅपिटल्सा आड बरी खेळी केली. ताणे पयलो सको मारतकूच आयपीएलांत सगल्यांत फास्ट 150 सके  मारपी तो बॅट्समन थारलो. आयपीएलाच्या ह्या सिझनात राहुल लयींत दिसता. ताणे आयपीएल कारकिर्दींतलो 29वो अर्द शेंकडो केलो. ह्या सिझनांतले ताचो हो तिसरो अर्द शेंकडो आसा. आयपीएलाच्या इतिहासांत सगल्यांत फास्ट 150 सके मारपाचो विक्रम संजू सॅमसनाच्या नांवार आसा. ताणे आयपीएलांत 125 मॅचींत 150 सके मारल्यात. राहुलान 100 परस कमी मॅचींत हो पराक्रम केला. रोहीत शर्मान 129 आनी विराट कोहलीन 132 डावांत 150 सके मारल्यात. सगल्यांत फास्ट 150 सक्यांचो विक्रम ख्रिस गेलाच्या नांवार आसा.
—————————————————————-