भांगरभूंय | प्रतिनिधी
लक्ष्मीदास बोरकार जल्मशती सुवाळो मुंबय मराठी पत्रकार संघांत उर्बे उमेदीन
पणजी: देवभूंय गोंयांत खूबशीं रत्नां जल्मांक आयलीं, तातूंतलें एक तेजस्वी नखेत्र म्हणल्यार स्वातंत्र्यसैनीक, ज्येश्ठ पत्रकार आनी संपादक लक्ष्मीदास बोरकार अशें उलोवप केंद्रीय उर्जा राज्यमंत्री श्रीपाद नायक हांणी केलें.
मुंबय मराठी पत्रकार संघाच्या सभाघरांत आयोजीत केल्ले हे विशेश कार्यावळींत लक्ष्मीदास कृष्णा बोरकार हांच्या जल्मशती वर्सा निमतान विवीध मानेस्तांचे हाजिरेंत तांची भोवमानान याद केली.
कार्यावळीचें संयोजन आनी आयोजन मुंबय मराठी पत्रकार संघाचे अध्यक्ष संदीप चव्हाण हांच्या फुडारपणा खाला केलें.
मुखार उलयतना श्रीपाद नायक हांणी म्हणलें बोरकार हांणी समाजा खातीर आपले लेखणींतल्यान आनी कृतींतल्यान दिल्ली सेवा मोलादीक आसा. पुर्तुगेज सत्ते आड लढो दितना तांणी डॉ. राम मनोहर लोहिया हांकां गोंयांत हाडले. अटक सहन केली पूण तडजोड केली ना. तांच्या लेखनांत गोडसाण आशिल्ली, पूण तो आवाज दुबर्ळांचो आशिल्लो. तांचो आदर्श आनी सत्यप्रीय वृत्ती आयचे पिळगेन सांबाळप हीच तांकां खरी आर्गां थारतलीं.
बोरकार हे एक उत्कृश्ट पत्रकार, लेखक आशिल्लेच पूण तेच बरोबर एक बरे कुटुंब मुखेलीय आशिल्ले. ते खातीर समाजांत सगल्या मळार काम करीत आसतना लेगीत कुटुंबांचेरूय योग्य संस्कार केले. अशा व्यक्तीमत्वाचो जल्मशती सुवाळो आयोजीत करतना आमकां खोस भोगता अशें संदीप चव्हाण हांणी म्हणलें.
हांव बोरकार हांच्या हाताखाला घडलों. तांणी म्हाका बापाय भशेन मोग दिलो. एकदां चूक केले उपरांत हांवें राजिनामो दिल्लो. पूण तांणी तो पिंजून उडयलो. गोंया खातीर तांचें योगदान खूब मोटे आसा अशें ज्येश्ठ पत्रकार सुरेश वाळवे हांणी सांगलें.
बोरकार स्वता बातम्यो करताले. तांचे हाजिरेन कचेरेक एक वेगळीच उर्जा येताली. ते साक्षात पत्रकारितेचें चैतन्य आशिल्ले. ते न्यूज एडिटर जाले, पूण ‘लोकसत्ता’चे संपादक जावंक शकले नात ही खंत आयजूय आसा अशें लोकसत्तांतले आदले सहकारी प्रकाश कुलकर्णी हांणी म्हणलें.
कार्यावळीचे सुरवेक बोरकार हांचे जिणेचेर आदारीत म्हायतीपट दाखयलो. तशेंच तांच्या तीन पुस्तकांच्या नव्या आवृत्त्यांचे प्रकाशन मानेस्तांचे हस्तुकीं केलें. कार्यावळीक येवकार मुंबय मराठी पत्रकार संघाचे भांडारी जगदीश भोवड हांणी दिलो. सुत्रसंचालन उपाध्यक्ष स्वाती घोसाळकार हांणी केलें जाल्यार उपकार संजय चांदेकर हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
