भांगरभूंय | प्रतिनिधी
खबरां संस्था
मुंबयः विराट कोहली आनी रोहीत शर्मा हांकां भारताच्या टी-20 पंगडांतल्यान काडपाक शकता अशे संकेंत मुख्य प्रशिक्षक राहुल द्रवीड हाणे दिल्यात. श्रीलंके आडचे दुसरे टी-20 मॅचींतले निर्शेणीचे कामगिरी उपरांत द्रविडान हे संकेत दिल्यात. तरणाट्या खेळगड्यांचो चड विचार सुरू आसा. टी-20चो तरणाट्यांचो पंगड करपाची येवजण आसा मात सिनियर खेळगड्यांक भायर बसयतले हे विशीं ताणे चड कांय सांगलें ना.
रोहीत शर्मा आनी विराट कोहली हांका टी-20 पंगडांतल्यान काडटले अशी चर्चा टी-20 संवसारीक कंरड सर्तींत उपांत्य फेरयेंतल्यान भारत भायर पडलेउपरांत सुरू जाल्ली. श्रीलंके आडचे तीन मॅचींचें टी-20 माळे खातीर हार्दिक पंड्यांक कॅप्टन केल्लें. जाल्यार रोहीत आनी कोहलीक पंगडा भायर दवरिल्लें. प्रशिक्षक राहुल द्रविडान 2024चे टी-20 संवसारीक सर्ती खातीर तरणाटो पंगड करपाचे संकेत दिल्यात.
द्रविडान रोहीत आनी विराट सोडून हेर कोणाचें नांव घेतलें ना तरी भारतान टी-20 आंतरराष्ट्रीय मॅची पळोवपाचो निर्णय घेतला हे तांणे स्पश्ट केलां. 50 ओव्हरींची संवसारीक करंड सर्तीचे फांटभुंयेर आता वन-डे फॉर्मेटाचेर चड लक्ष आसतलें अशें ताणे सांगले. ह्या वर्साच्या निमाणे भारतात ही सर्त जातली. फाटल्या टी-20 संवसारीक करंड सर्तींत इंग्लंडा आड उपांत्य फेरयेंत खेळल्ल्या पंगडांतले तीन वा चार खेळगडे श्रीलंके आडचे माळेंत खेळटात. आमी टी-20च्या फुडे सर्ती खातीर तरणाटो पंगड वेंचून काडपाच्या विचारांत आसात. श्रीलंकेच्या दर्जेदार पंगडा आड खेळप हो पंगडा खातीर बरो अणभव आसा. वन-डे संवसारीक करंड आनी संवसारीक टॅस्ट चॅम्पियनशीपी कडेन सगल्यांची नदर आसा. म्हणून टी-20 आमचांक तरणाट्या खेळगड्यांक वापरपाची संद दिता अशें द्रविडान सांगलें.
हार्दिक टी-20चो नियमीत कॅप्टन
श्रीलंके आडचे दुसरे टी-20 मॅचींत टी-20 संवसारीक सर्तींत इंग्लंडा आड खेळल्ल्या भारतीय पंगडाले हार्दिक पंड्या, सूर्यकुमार यादव, अक्षर पटेल आनी अर्सदीप सिंग हेच खेळगडे आशिल्ले. हार्दिक पंड्यान संवसारीर करंड सर्ती उपरांत न्यूझिलंड आनी श्रीलंके आडचे दोन टी-20 माळेंत भारताचें फुडारपण केलां. हाच्याय फुडें तो टी-20 मॅचींचो कॅप्टन उरपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
