भांगरभूंय | प्रतिनिधी
मडगांव: धांवते रेल्वेंत सान पिरायेच्या चलयेच्या विनयभंग प्रकरणांत दुबावीत रोहन शेट्टी (37, रा. ठाणें, महाराष्ट्र) हाका कोंकण रेल्वे पुलिसांनी अटक केल्या. ताका पणजेंतल्या बाल न्यायालयांत हजर करतकूच 14 दिसांची न्यायालयीन कोठी दिल्या.
मुंबय सावन कोच्चुवेली असो प्रवास करपी एका सान पिरायेचे चलयेचो विनयभंग केल्ल्याची म्हायती कोंकण रेल्वे पुलिसांक मेळ्ळे उपरांत कोंकण रेल्वेचे पुलीस निरिक्षक सुनील गुडलर आनी वांगड्यांनी दुबावीत रोहन शेट्टी हाका ताब्यांत घेवन अटक केली.
ठाणें सावन सुटिल्ली आनी कोच्चुवेली वचपी रेल्वेंत आयतारा हो प्रकार घडिल्लो. दुबावीत रोहन शेट्टीन ताचे बरोबर प्रवास करपी एका सान पिरायेचे चलयेचो विनयभंग केलो. संबंदीत चलयेन हो प्रकार कुटुंबाक सांगलो. हो प्रकार गोंयचे शिमेंत पेडणें रेल्वे स्टेशना मजगतीं घडलो.
रेल्वे मडगांव रेल्वे स्टेशनार रावले उपरांत पिडीत चलयेचे आवयन कोंकण रेल्वे पुलीस स्टेशनार हे विशींची कागाळ नोंद केली. तत्काळ कागाळीची नोंद घेवन विनयभंग करप, गोंय बालहक्क आनी बालसंरक्षण कायद्या खाला गुन्यांव नोंद करून दुबावीत शेट्टीक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
