भांगरभूंय | प्रतिनिधी
पणजी : पणजी ते रेईश मागूश मेरेनचो रोपवे प्रकल्प तशेंच सांता मोनिका जेटी मेरेनच्या पांयपुलाक गोंय दर्यादेग वेवस्थापन प्राधिकरणान मान्यताय दिल्या. हालींच जाल्ले प्राधिकरणाचे बसकेंत रोपवे तशेंच पांयपूल प्रकल्पाक मान्यताय दिली.
गोंय पर्यटन उदरगत म्हामंडळान 2016 वर्सा रोपवे प्रकल्पाचो प्रस्ताव तयार केल्लो. मान्यताय तशेंच परवाने मेळोवपाक कळाव जाल्ल्यान हो प्रकल्प स वर्सां तसोच उरलो. आतां स वर्सांनी रोपवे प्रकल्पाक मान्यताय मेळ्ळ्या.
150 कोटींच्या ह्या प्रकल्पाक गुंतवणूक म्हामंडळान (आयपीबी) मान्यताय दिली. उपरांत मंत्रीमंडळान मान्यताय दिल्ली. प्रवासी तशेंच पर्यटक येरादारी खातीर पणजे ते रेईश मागूस मेरेन रोपवे उबारून ताची कारवाय करपी हो प्रकल्प आसलो. ह्या प्रकल्पाक गोंय दर्यादेग वेवस्थापन प्राधिकरणाच्या मान्यतायेची गरज आसा. ह्या अटीक लागून गुंतवणूक म्हामंडळान हो प्रकल्प रद्द केलो. ह्या प्रकल्पा खातीर पर्यटन उदरगत म्हामंडळान रायल रायडस कंपनी कडेन कबलात लेगीत केली. घोळटे रॅस्टोरंण्ट, अॅक्वारियम हांचो प्रकल्पांत आस्पाव आशिल्लो. आतां दर्यादेग वेवस्थापन प्राधिकरणान प्रकल्पाक मान्यताय दिल्या.
पाटो कार पार्कींग प्रकल्प ते सांता मोनिका जेटी मेरेन पांयपूल जातलो. 5 कोटींच्या ह्या पांयपुलाचो बुन्यादी फातर येता त्या सप्तकांत बसयतले. फाटले बसकेंत गोंय दर्यादेग वेवस्थापन प्राधिकरणान मान्यताय दिल्या. 31 मिटर लांब आनी 6 मिटर उंचायेच्या ह्या पुलाची उबारणी बीबीआययूआर एजन्सी करतली. हे विशीं पर्यटन उदरगत म्हामंडळान कबलात केल्या. सांता मोनिका जेटी मेरेन वचपाक ज्येश्ठ नागरिकांक आडखळी येतात. तांचे सुविधे खातीर हो पांयपूल जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
