भांगरभूंय | प्रतिनिधी
आयच्यान तीन दीस पणजे विवीध कार्यावळींचे आयोजन
भांगरभूंय I प्रतिनिधी
पणजी : योगाच्या माध्यमांतल्यान रोग आनी नशामुक्ती हेंच आपलें मुख्य लक्ष्य अासा. आतां मेरेन तातूंत आपणाक व्हड येस मेळ्ळां. फाल्यांच्यान तीन दीस राज्यांत आयोजीत फुकट योग शिबिरांत नागरिकांक रोग आनी वखदां पसून पयस दवरपाचो आपलो यत्न आसतलो, अशें योगगुरू रामदेव बाबा हांणी सांगलें.
शेनवारच्यान सुरू जावपी फुकट योग शिबिराची म्हायती दिवपा खातीर शुक्रारा पणजे घेतिल्ले पत्रकार परिशदेंत ते उलयताले. योग मनशाची कूड आनी मन निरोगी दवरता. नियमीत योग करप्यांक कसलेंच दुयेंस जायना. वा तांकां वखदांचीय गरज लागना. ताका लागुनूच फाटल्या जायत्या वर्सां पसून भारतभर योगा विशीं जागृताय करता. विवीध गंभीर दुयेंसांनी त्राशिल्ल्यांक आपूण योगाच्या माध्यमांतल्यान बरे केल्यात. गोंयांत फुडल्या तीन दिसांत गोंयकारांकूय तेच नदरेन मुखार व्हरपाचो आपलो यत्न आसतलो, अशें रामदेव बाबा हांणी सांगलें.
आयज समाजांत मोट्या प्रमाणांत अश्लिलता पातळत चल्ल्या. पॉर्न फिल्मा प्रमाण चित्रपट, माळेंतल्यानूय अश्लिलतेक सारें घालतात. ताका देशांतली तरणाटी पिळगी बळी पडत आसा. अशा तरणाट्यांक तातूंतल्यान भायर काडून आदर्श नागरीक घडोवपाचो आपलो यत्न आसा. तेच फाटभुंयेर शेनवारा सांजे 7 ते 10 ह्या वेळांत नामनेचे गायक कैलाश खेर हांच्या सनातन संगीत महोत्सवाचे मिरामार दर्यादगेर आयोजन केलां, अशें तांणी सांगलें. 20 फेब्रुवारी दिसा ताळगांवच्या डॉ. श्यामा प्रसाद मुखर्जी इनडोअर स्टेडियमाचेर शिक्षक आनी विद्यार्थ्यां खातीर कार्यावळीचे आयोजन केला. तातूंत गोंयांतल्या शाळांक भारतीय शिक्षण मंडळाक जेडपाचें आपले यत्न आसात. शिक्षणांत प्राचीन मुल्यांचो अास्पाव करून ते पद्दतीन शिक्षण विद्यार्थ्यांक दिवप आनी राष्ट्रा खातीर तांकां सज्ज करप होच फाचे फाटलो मुख्य उद्देग आसा, अशें तांणी नमूद केले.
मजगतीं, गोवा पतंजलीचे दक्षीण भारतांतले सगल्यांत व्हड केंद्र थारचे, हे खातीरूय आपले यत्न
सुरू आसात. जात, पात, धर्म, पंथ, समुदाय ह्या सगल्यांक कुशीक दवरून आपूण सगले एका भारतमातेची भुरगीं आसात ही भावना सगल्यां मदीं जागृत करपाच्या हेतानूच आपूण यत्न करता, अशेंय रामदेव बाबा हांणी म्हणलें.
सनातन धर्म राजकी अजेंडा न्हय
सनातन हें निर्विवाद उतर आसा. सनातन धर्मांत शाश्वत मुल्यां येतात. हिंदू, बौद्ध, जैन, शीख सनातन धर्मांत येतात. ताचे फुडें वचून इस्लाम, ईसाई ह्या धर्मांतूय सनातन मुल्यांच आसात. ताका लागून सनातन धर्म हो धर्म वा राजकी अजेंडा न्हय, अशें रामदेव बाबा हांणी ह्या वेळार स्पश्ट केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
