भांगरभूंय | प्रतिनिधी
निवृत्तींतल्यान पुनरागमन अणभवी ड्रॅग फ्लिकर रुपिंदर पाल सिंग हाका जकार्तांत 23 मे ते 1 जून मेरेन चलपी आशिया करंड सर्ती खातीर भारताच्या दुसऱ्या दर्जाच्या हॉकी पंगडाचो मुखेली केली. मनप्रीत सिंग, हरमनप्रीत सिंग आनी पी आर श्रीजेश सारक्या वरिश्ठ खेळगडे हे सर्तींत खेळचे नात. वीरेंद्र लाकडा उप मुखेली आसतलो.
रुपिंदर आनी लाकडा हांणी पोरूं टोकियो ऑलिम्पिका उपरांत खेळांतल्यान निवृत्ती घेतिल्ली. पूण, उपरांत निवडीक उपलब्ध जाले. आशिया करंड सर्त संवसारीक करंड सर्तीची पात्रताय सर्त आसा. पूण, येजमान ह्या नात्यान भारताक फुडल्या वर्सा जानेवारींत जावपी हे सर्तींत प्रवेश मेळ्ळा. आशिया करंड सर्तींत पयल्यो तीन सुवातो मेळोवपी पंगड संवसारीक सर्तीक पात्र थारतले. दोन खेपेचो ऑलिम्पीयन खेळगडो सरदार सिंगाक मुख्य प्रशिक्षक केला. आदलो मुखेली सरदार सिंगाची मुख्य प्रशिक्षक म्हणून ही पयली सर्त आसतली.
भारताचो आनीक एक अणभवी खेळगडो एस व्ही सुनीलान लेगीत निवृत्ती उपरांत पुनरागमन केलां. टोकियो ऑलिम्पिकांत दुखापतीक लागून ताका खेळपाक मेळूंक नाशिल्लें.
आशिया करंड सर्तींत भारताक जपान, पाकिस्तान आनी येजमान इंडोनेशिया हांच्या वांगडा अ गटांत दवरला. जाल्यार मलेशिया, कोरिया, ओमान आनी बांगलादेश हांकां ब गटांत दवरल्यात. भारताच्या पंगडांतले 10 खेळगडे सिनीयर पंगडांत पदार्पण करतले.
पंगडः (गोलकीपर) पंकज कुमार रजक, सुरज करकेरा, (डिफॅण्डर) रुपिंदर पाल सिंग (मुखेली), यशदीप सिवाच, अभिषेक लाकडा, वीरेंद्र लाकडा, मंजीत, दीपसन टिर्की, विष्णुकांत सिंग, राजकुमार पाल, मरीस्वरेन शक्तीवेल, शेष गौडा बीएम आनी सिमरनजीत सिंग, (मिडफिल्डर) विष्णुकांत सिंग, राज कुमार पाल, मारीस्वरेन एस, (फॉरवर्ड) पवन राजभर, अभारण सुदेव, एस व्ही सुनील, उत्तम सिंग, एस कार्ती, (स्टॅण्डबाय) पवन, परदीप सिंग, अंकित पाल, अंगद बीर सिंग.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
