भांगरभूंय | प्रतिनिधी
भांगरभूंय । खेळां मेज
पणजीः आलापुझा- केरळ हांका आयोजीत केल्ले 84वे आंतरराज्य कॅडेट्स आनी सब ज्युनिअर राष्ट्रीय टेबल टॅनीस सर्तीत वांटो घेवपा खातीर गोंयचो टेबल टॅनीस पंगड केरळात वचपाक भायर सरला. 19 तें 26 फेब्रुवारी मजगतीं ही सर्त जातली.
राज्य पांवड्यार अव्वल कामगिरी करपी युवा पॅडलर रुची कीर्तनी 13 आनी 15 वर्सा पिरायेच सकयल्ले गटांत चलयाच्या पंगडाचें फुडारपण करता आनी पंगडांत प्रतिभावान खेळगडींचो आसपाव आसा. राष्ट्रीय पांवड्या वयले सर्तींत खेळपाक तें उत्सूक आसात.
राष्ट्रीय टेटे चॅम्पियनशीप ही टेबल टॅनीस फेडरेशन ऑफ इंडियाची प्रतिश्ठीत सर्तींतली एक सर्त आसा. ताका लागून हे सर्तींत वांटो घेवपा खातीर गोंयांतल्या तरणाट्या प्रतिभावंताची निवड केल्या. हे सर्तींत देशांतले सामके बरे टेटे खेळगडे वांटेकार जातले. गोंयच्या पंगडांन तांचें आव्हान स्विकारपाची सगळी तयारी केल्या, अशें गोंय टेटे असोसिएशनाचो सचीव ख्रिस्तोफर मिनेझिसान सांगलें.
गोंय पंगडः आरोन फरियास, अक्षन लवंदे, अथर्व धुळपकार, चंदन कारो, ध्रुवा कामत, गल्या फर्नांडीस, इशिता कुलासो, खुशाल नायक, लिओमा फर्नांडीस, नीजा कामत, प्रज्ञा कारो, रिया गोपी आनी रुची कीर्तनी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
