रामायण कोंकणीचे कुणबी बोलींत

भांगरभूंय | प्रतिनिधी

आजून साबार रामायणां कोंकणींत प्रचाराक आयलीं. हातूंत गोडे रायण्ण, रघुरामायण आनी रामचरितमानस हाचो अणकार अश्यो कृतियो केरळांत सावन जाल्याय. रामायण काव्य आनीकय कोंकणींत हाडपाक खातीरचो आतां केरळांत एक नवो यत्न जाला. माया आनी सदानंदन ह्या दांपत्याच्या वतीन. हांगेल्या फाटल्या वीस वर्सांच्या प्रयत्नाचें फळ म्होण कोंकणी भाशेंत
कुणबी बोलींत ‘कुळब्यारामायण’ हें रामायण भायर सरता. सदानंदन मास्टर जिल्ले न्यायालयांत सावन हेड क्लार्क पदवी वेल्यान हालींच सेवानिवृत जाले. पत्नी माया केरळ सरकाराच्या रानां खात्यांत हेड क्लार्क पदवीचेर कामार आसा. सदानंदन एक बरें प्रभाषक म्होण आनी माया कवयत्री म्होणूय वळख जोडलां.
1999 वर्सा कोची तुंडी परंबु कुणबी वाटारांत नवें निर्मिल्या देवळांत श्री गोपालकृष्ण मूर्तीची प्रतिष्ठा जाली. हाका लागून देवळांत सेवा म्होण माया, सदानंदन जोडप्यांनी रामायण वाचन सुरु केल्ले. हें एक विशेष कार्यक्रम म्होण चालू रावलें. रामायण वाचन आयकूंक साबार लोकुय मेळताले.
कवी वाल्मिकी महर्षी हांगेलें वाल्मिकी रामायणाचें केरळ राज्यांत प्रचाराक आशिल्ले तुंजत्त रामानुजन एष़ुत्तच्चन हांणी केल्ले मलयाळम भाशेंतले विवर्तन ‘अध्यात्म रामायण’ हांगा वाचनाक वापरताले. दर सांजे वेळार सदानंदन रामायण तालान पारायण करतालो आनी माया आयकुप्यां खातीर दर एके भागाचें अर्थ सरळ रितीन आपली आवय भास कुणबी कोंकणी बोलींत सांगून दिताले. हें चालू आस्तनाच परबें दिसांनी वाड्यांतल्या घरां कडेन आनी हेर केन्द्रां कडेनय रामायण वाचनाक तांकां आपोवणे येतालें.
दोन वर्सा पयली तांकां दिसलें, तांणीं वाचताले अध्यात्म रामायण मलयाळम भाशेंत सावन सरळ कुणबी बोलींत कोंकणी भाशेंत भाशांतर करनु भौसां कडेन पावोवंका आनी माय भाशेचो प्रचार करका अशें. दुसरें दिसा व्रत पळोवन आनी श्रीराम देवाक पूजा पावन तांणीं रामायण रामायणाचें विवर्तन सुरू केल्ले म्हळ्यार जता. सदानंदन वाचतलो आनी पत्नी माया आपल्या बोलींत बरोव॔न घेतालें. आनी आपल्या टॅबाचेर त्या त्या दिसा टायप करनु दवरतालें.
बालकाण्ड, अयोध्याकाण्ड, रानाकाण्ड, किष्किन्धेकाण्ड, सुंदरकाण्ड आनी युद्धाकाण्ड अशीं हांतु स अध्यायां मेळताय. मलयाळम लिपींत आनी देवनागरीं लिपींत अशीं दोन विंगविंगड पुस्तकां उजवाडायतलें.
(लेख केरळी कोंकणी बोलींत)

डाॅ. राजीव भास्कर
9349295255